L’Angolo de la Wanda – Maggio 1994 – “CONCERTO -T. GOBBI-“

…a cura di Graziano M. Cobelli

gcobelli05@gmail.com

Quatro Ciàcoe: da Verona

“CONCERTO – T. GOBBI -“

Poco tenpo fa, ne la stupenda cornisa de la sala Maffeiana de Verona, dove, tra i coloradi affreschi da la magica prospetiva, par de sentir ancora rimbalsar le note del clavicembalo caressà da le mane de Mozart, s’à svolto el concerto de comemorassion par el baritono Tito Gobbi nel decenal da la scomparsa.
A parlar del personagio, è vegnù el noto musicologo dr. Carlo Bologna che, oltre a traciar un profìl critico del cantante e de I’omo de teatro, I’à fato sentir diverse so significative interpretassioni liriche e cameristiche; particolarmente bele e tocanti le do cansoni venessiane: quela tristissima de “Nennella” e l’altra, frissante, de “La biondina in gondoeta”.
A la comemorassion vera e propia, à fato seguito el recital de Alessandro Corbelli, el giovane ma za bravissimo baritono che ‘l stà rancurando alori a scariolade, al Filarmonico, ne “Le nosse de Figaro” de Mozart. Ouantomai centrà la selta de le cansoni classiche: de Bellini, Donizetti, Verdi, Respighi, Ghedini, Alfano, Pizzetti e Tosti, tute de ‘na granda sugestion.
Presente a l’elegante concerto, in rapresentansa de la fameia Gobbi, gh’è stà’ la gentilissima signora, Baronessa Barbara Zanchetta al cui papà, Barone Agostino Zanchetta, se deve la scoperta de le straordinarie doti canore del “nostro”; un artista conpleto; insuperabile e indimenticabile. Un elogio anca a la brava Prof.ssa Forgione che à compagnà al piano, magistralmente ma soratuto con sensibilissima partecipassion, el baritono Corbelli.

Wanda Girardi Castellani