L’Angolo de la Wanda – Maggio 1993 – “I capitèi de Verona”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“I capitèi de Verona”

Quando l’ amigo Carlo Caporal, brào pitor veronese e apassionado ricercador de l’arte popolare antica de la Lessinia, el m’à dimandà de farghe su misura qualche poesia sui capitèi veronesi par ‘na certa publicassion in cantier, mai avarìa pensà che sarìa po’ vegnù fora inveçe un libro d’arte de l’I.R.S.E.P.S. (Istituto de ricerche e studi su l’edilissia popolare sacra) curà da quel Padre Fiorenzo da Marostica (Silvano Cuman) che ‘l gà za al so ativo ‘na trentina de altre publicassioni, e che avemo za conossudo proprio su le pagine de Q.C. ‘Sta so ultima fadiga: “I capitèi de Verona”, fata in colaborassion con Caporal e che la porta ànca ‘na pagina con tre me poesie, la elenca… con tanto de foto e cronistoria, 231 capitèi semenà tra Verona, Avesa, Quinsan, Poian e Marsana. La veste tipografica l’è bela e elegante. La copertina, in tela verde con soracoèrta azura, la porta l’imagine de la Vergine che se poI amirar a porta Vitoria; quela stessa che più òlte, nel tempo andado, l’à salvà i veronesi da le furie de l’Adese. Le foto nel testo, quasi tute a colori, i è sugestive e de ‘na grande poesia. Idem par i aquarèi de Giordano Zorzi. Ne le prime pagine; un comento del nostro emerito yescovo Giuseppe Amari e, oltre a la prefassion de i autori, quele de: L. Fontana, de U.G. Tessari, del poeta e storico P. Piazzola e de la gIornalIsta Vera Meneguzzo.
Ma, tornando a padre Fiorenzo, disemo che ‘l ghe voI ben al nostro dialeto e a “Quatro Ciàcoe”; l’è laureado in missiologia (studio dei problemi relativi a le Missioni) e diplomà in storia de l’arte e de la cultura, e el se interessa de la salvaguardia del patrimonio religioso e popolare.
A quel che ò capido, el so “hobby apostolato” i è propio i capitèi, o “edicole”, che lu ghe piase definir: “i fiori de le Cese parochiali”. Essendo un frate, de sicuro no’ ‘l sarà d’acordo che elenchemo i so tanti meriti, ma i amiçi de “Q.C.” i gà pur el dirito de saverlo che oltre a un omo de Dio l’è ànca ‘na personalità de la cultura che porta lustro a la nostra tera, visto che, par fortuna, l’è ànca la sua. Come se no’ bastasse, l’ama anca la poesia, specie quela in veneto, tanto è vero che ancora ‘na òlta l’à volù coronar un so libro con poesie (oltre che mie) dei nostri: Berto Rossignolo e Guido Querena. Paraltro, par no’ ciapar del “rassista”, el ghe n’à zontà anca in italian. Padre Cuman, che ‘l cura, oltre al resto, el boletin quadrimestral “Amiçi de i capitèi”, el vive nel convento dei Frati Cappuccini, in via Fincato (Verona), propio dove ogni ano, nel periodo natalissio, se poI amirar el più bel presepio de la provincia. In coa a l’intervista, padre Fiorenzo el m’à anticipà la notissia de ‘n altro libro in cantier sui capitèi internassionài… e noialtri spetemo de lesarlo!

Wanda Girardi Castellani

* SANT’ ANTONIO al ponte Piera

Me n’ò inacorta nel passarghe sòto;
l’avea salvà le case al ponte Piera
e l’era lì da quasi çinquant’ani
a ricordar le site de la guera.                         (site = saette/fuochi)

A drita, ‘pena for da la toreta,
sant’Antonio ne conta sensa borie
quando che i cruchi à stramencià Verona
sparpajàndone in fregole la storia.

G’à pensà lu… parlando sotovoçe
drento la recia del bambin Gesù
e quando ch’è saltà i archi romani
le case inveçe i è restade sù.

Ma se vede che po’ passà el miracolo
ne sta viçenda più nissun se specia
e ‘l Santo drio la pòlvar ghe la conta
ormai solo al bambin… drento la recia.

Wanda Girardi Castellani *(una de le poesie stampà sul volume)