L’Angolo de la Wanda – Luglio bis 1995 – “PIA TASSINARI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“PIA TASSINARI”

Col numaro 6-7 (Iùio-agosto) de “Q.C.”, 1993, emo dà notissia del premio “Na vita par la lirica” che el circolo “G. Zenatello” el g’avea par quel’ano assegnà a la soprano Pia Tassinari; un nome ilustrissimo nel mondo del bel melodrama.
‘Desso, el 15 de ‘sto ultimo piovoso e fredo magio, Pia, dolce interprete de i più bei personagi feminili, specialmente verdiani e puciniani, l’è volà arente al so Rodolfo, el tenor Ferruccio Tagliavini scomparso a fine genaro.
Nata a Modigliana de Forli el 15 de setembre 1903, a quasi 92 ani rinovà da poco la patente, la guidava ancora, tanto che I’ictus che, in 3 giorni el g’à smorsà par sempre la voçe, che la g’avea ancora limpida, el I’à brincà de ritorno da ‘n pranso fra amissi dove che I’èra ‘ndà da par ela, al volante de la so machina.
L’avea debutà su le sène nel 1929 a Casale Monferrato par po’ esibirse nei più importanti teatri del mondo. EI so unico grande amor l’è stà Ferruccio Tagliavini che I’à assistì fin a la fine, spostandosse da Faenza a Reggio Emilia, pur se’l so omo el I’avea da ani ‘bandonà par una più giovane de ela.
In Arena ghe I’aveimo avù nel 1936/1937 e nel ’54; quel’ano ne la parte de Amneris in Aida, parché Pia, grassie a ‘na particolare estension de voçe e versatilità interpretativa, I’à podù cantar indifarentemente da soprano e da mesosoprano.
Par so desiderio, involtolà in un ninsol, drento ‘na senplice bara de legno, l’è stà sepelì in un picolo çimitero su ‘na colina de la so Modigliana e la lirica, ancora ‘na òlta, l’è in luto.

Wanda Girardi Castellani

Fonti:
Pia Tassinari (archivio Luciano Pollini)