L’Angolo de la Wanda – Luglio 1995 – “Antonio Salieri”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Antonio Salieri”

Ne la magior parte de i casi, anca i veronesi i ò sentì parlar, e par la prima òlta, del so conteraneo Antonio Salieri, qualche ano fa, quando el regista Milos Forman, sul romanso de Peter Shaffer, I’à firmà “Amadeus”; un film belo ma che, nel concerto de la storia, el sòna falso come ‘na campana crepà. Epura, Salieri, nato a Legnago (VR) el 18 agosto 1750 e morto a Vienna el 7 magio 1825, I’avea composto, “Les Danaides”, “L’Europa riconossuda”, “La grota de Trofonio”, più altre 35 opere liriche. Inoltre, tra le musiche sacre: 6 messe, 2 requiem, 14 graduali, 31 ofertori, 9 salmi, 2 litanie, 9 inni, 6 mottetti, 17 introiti, 7 varia, 4 oratori. Tra la musica profana, opere a parte: ‘na fila de cantade, de cori, quasi 200 “canson” (che no i è ‘n’arma pesante, ma n’altra composission musical) e sentenara de sesteti, quinteti, quarteti, terseti, dueti, arie, cadense, cansonete, cavadine, recitativi, concerti, baleti, operete, sinfonie, marce, musiche da camara e via discorendo, sensa contar le poesìe, parché l’era pura poeta.
Penso che pochi altri composidori i sia stà cusì fecondi, peraltro anca Legnago, pur vantando un teatro che porta el so nome, I’à scominçià da poco a darse da far par cavarghe da dosso la pòlvar del desmentegon, organisando incontri, concerti e, soratuto, riportando ai antichi fasti el sucitado teatro. Salieri, dunque, fiol de ‘n comerciante dal qual l’avea ciapà anca el nome de bateso, el g’à ‘vu fin da buteleto la passion par la musica. EI primo maestro I’è stà I’organista legnaghese Giuseppe Simoni (1760/65) ma, dopo la morte de i genitori, nel 1766 l’è ‘ndà a studiar a Venessia da dove, nel stesso ano, I’à ciapà el volo verso Vienna, entrando ne le bone grassie de Giuseppe Il. Tanti inportanti composidori i è stà so alievi e tra questi: Schubert, Liszt, Meyerbeer e Beethoven. EI s’à curà anca de l’istrussion de i fioi de Mozart che l’à pura ‘iutà in altri modi. EI film de Milos Forman el ne fa inoltre credar che Salieri el fusse scapolo e votà a la castità perpetua, inveçe el s’ avea sposà el 21 setembre 1775 con Maria Theresia Helferstorfer a la qual, par via de la castità, el g’à fato far ben 8 fioi.
In quanto po’ a la bàbola che’l sia stà lu a tor de mèso Mozart, par marsa invidia, i g’à pensà oramai i storici e in particolar ‘na dotoressa inglese, a riabilitarlo. Infati, za a la fine del 1990 sul ‘jorunal of the Royal Society of medicine” ‘sta qua l’à diagnosticado, sula base de i sintomi de la malatia che à portà a la morte a soli 36 ani el grande composidor salisburghese, che el colpevole, se de colpevolessa se poI parlar, l’è stà el dotor personal de Mozart che a forsa de salassi (secondo l’uso del tenpo) el g’à stroncà el fisico za debilità. A metar in giro le ciàcole, l’è stà po’ un scritor russo, Aleksandr Puskin che, nel 1830, su la base de i petegolessi de la corte de Vienna, l’à scrito un drama: “Mozart e Salieri” nel qual el “nostro” el ghe rifila el velen al “rival” in arte, drento ‘na copa de champagne.
Tegnendo ben presente che Salieri, al tempo, l’èra assè più celebre de Mozart, che l’èra stimado maestro de i magiori nassenti ingegni musicài e considerà da i melomani de l’è poca, superiore al giovane composidor austriaco, no’ se capisse che rassa de rivalità el podesse aver coàdo verso ‘sto qua. L’invidiado inveçe l’èra propio lu, bersalio anca de plagi, vedi Gluck che fin a la 12ª replica de “Les Danaides” el se n’avea atribuì la paternità. Solo, apunto, ala 12ª l’è ‘ndà fora sul palco a rivelar che’l capolaoro l’èra de Salieri, da la A a la Z.
Quanto a la morte de Mozart; in realtà l’è un “gialo” che a tuto anco ancora no’ l’à catà el so Ercole Poirot a sgomissielàrghene el cao. Però l’è çerto che’l grande salisburghese el fusse gran Maestro de la Massoneria e, a quei ciari de luna (vedi la fine de Caliostro) no’ l’èra miga massa igienico far parte de quel misterioso consesso, poco ben visto specialmente nei ambienti catolici. Personalmente trovo strambo che un composidor celebre in tuto el mondo el sia finì in una fossa comune sensa ‘ na strassa de piera par de sora. Come se no’ bastasse, in ‘sto secolo i à catà do crape, tute do atribuide a Mozart; l’ultima, in Russia, fata-su in t’un foio de giornal. Che Mozart el g’avesse ‘na gran testa, semo tuti d’acordo… ma che adiritura el ghe n’avesse do; bah!
Forsi, in realtà, qualchedun la pèle el ghe l’à fata sul serio e i l’à sepelì in pressia e in furia, in “coabitassion”, par evitar ogni possibilità futura de stabilir come l’è andada.
Quel che me par ovio l’è che con ‘sta morte Salieri no’l g’à vu gnente a che far. Anca se su de lu restarà, come par Robespierre, e tante altre celebrità de la storia e de l’ arte, la macia ingiusta de la calunia, cusì refrataria a la “scolorina” de la verità.

Wanda Girardi Castellani