L’Angolo de la Wanda – Luglio 1994 – “Modelismo: ‘na passion da certosini”.
…a cura di Graziano M. Cobelli
gcobelli05@gmail.com
Quatro Ciàcoe: da Verona
“Modelismo: ‘na passion da certosini”.
de Mirko Castellani
Colessionar boli, monede, figurine, scatole da fulminanti o altro, spesa a parte, el te farà anca fruar sole e tacili e pèrdar tenpo girando par bancheti e boteghe, ma in quanto a sodisfassion… volìo metar el modelismo; tra i vari “hobby” da carega l’è quel, l’è vera, che più el mete a prova la passiensa… quel che più el ga bisogno de braùra e de ‘na precision da certosin, ma l’è anca el più belo, specie quel naval!
I tipi i è diversi: naval in legno (el più nobile e ‘l più antico, quel che, ‘na òlta realisà, el te sgonfa de orgolio), naval navigante (a vela e a motor), aeromodelismo statico e con modèi volanti (‘sto ultimo, però, l’è sogeto a causar traumi e a promovar l’aprendimento veloce de ostreghe de novo cònio quando che’l model po’, mal manovrà, el te capota, andando in frègole), modèi de auto statici e non, modèi de carta o de plastica (i più usà) e infine i diorami, tipo quei che qua a Verona se poI vedar ogni ano a Nadal nela mostra che se tien in Arena.
Mi che ò proado ogni tipo de modelismo e che po’, da ani, son passà in grande a quel navale statico (velieri de l’800 in particolar) sostegno che, dopo ‘na giornada de laòro, magari tra ‘na barca de conti, problemi, stress ecc…, far modelismo l’è rilassante e ‘na òlta, po’, finì el modèl, no’ gh’è gnente de più esaltante de vardàrselo e far “circa” ai altri che a boca verta te lo vien vardar. Un posto dove che se poI amirar splendidi modèi de tute le epoche, fin da i tenpi de Colombo e prima, l’è el museo de l’arsenal de Venessia (uno dei mèio del mondo, con quel de Genova e de Barcellona); andeghe a ispirarve!
Par chi scominçia, consilio ‘na scatola de montagio. EI costo? Gnanca tanto e comunque de manco de ‘n par de scarponi da siàre. EI tenpo? Eh!, quelo l’è ‘n altro par de màneghe. Par un veliero se lo misura in mesi e qualche òlta in ani, senpre, se ‘ntende, se se ghe laòra drio n’oreta la sera parché se inveçe uno el voI far el stacanovista el po’ metar in pie el Victory in un mese ma alora el deventa LAÒRO e no’ più svago. Dunque; un model facileto de le dimensioni de 60-80 cm. parché uno più picolo ei sarìa roba da orolojar, cioè, caso mai, da esperti come mi (modestia a parte), mentre par uno più grande te ghe vorìa ‘na falegnameria (e ‘n museo per metarlo dopo). L’inportante l’è andarghe drio, va ben, quando se ghe n’à voia ma senpre almanco n’ora al giorno, sensa lassarlo mai lì del tuto, questo par no’ pèrdar la passion. ‘Na volta finido, el model l’è un capolaoro che no’ gà presso e che ‘l poI aredar ‘na sala mèio de ‘n Velazquez. Qualche intendidor l’è rivà a ofrir, par un model in legno, anca milioni (ma i mei no’ i vendo gnanca pa ‘l deposito de Fort Knox).
El legno l’è un material che a laorarlo el dà sodisfassion, el dà anca rogne però, specie quando se ga da piegarlo a vapor o incolarlo. L’è sogeto a secarse, po’ gh’è i cicli termici, l’inveciamento, l’umidità, e ne la realisassion se gà da tegnerghe conto. Inoltre ne le scatole de montagio se cata vari tipi de legno: de nose, tanganica, fagio, acero, betulla, piopo, tiglio, robino e par poderli tratar bisogna prima saverli distinguar. EI numaro de i tochi in cantier de solito l’è longo come el pàssio e se ga da andar avanti con atento studio dei piani de costrussion; el tenpo no’ l’è mai bastansa, specie quel preliminar, se no’ se voI conprometar tuto.
Se scominçia da l’ossadura; costruida da la “chiglia” (parte longitudinal) e da le ordinade; overo le sessioni trasversali incastrade ne la chiglia e che ghe dà robustessa al model e suporto al fassiame. ‘Na òlta parecià l’ossadura e controlada, ne la simetria e nei incastri de i àlbari, se taca co’ la posa del fassiame. Pò… eco la parte più divertente; le sovrastruture (tughe, bocaporti, paiolati ecc…), la veladura (in sta ultima se ga da metar a paneto mame e none, specie se i è dotà de ‘na qualche vecia Singer) e l’alberadura (albari, penoni, gabie ecc…). La parte più noiosa l’è la realisassion de le sartìe; poI èssarghene anca 12… ogniuna composta da ‘na scariolada de gropi, e le deve èssar parfete parche senò se lo vede e l’è bruto. Par le vele, ricordarse de no’ lavar mai la tela dopo de ‘verle fate; caso mai, lavarla prima. Infine, gh’è la selva dei fili che se vede su ogni velier che se rispeta.
L’ultima roba da montar, l’è la bandiera e a sto punto te vien da mètarte proprio su l’atenti, magari in atesa de la medaia che te senti de ‘verte merità! Fato el capolaoro, mai mètarlo vissin ai radiatori; catarghe el posto giusto, distante dal caldo e da le corenti d’aria (che no ‘l te ciapa el largo).
Gh’è anca i modèi in plastica, qua gh’è manco da laorar, basta solo assemblar i tòchi za pronti. Quindi, gnente segheti, trapanini e atressi vari da microchirurghi! ‘Na òlta finì, (ma anca se in plastica el te bùsara almanco un mese de sgobo) el model fa la figura de quei in legno… ma l’è tuta n’altra roba!
Una de le navi che rende ben in sto material, l’è el Titanic, come, d’altronde, tute le navi da guera moderne (vedi la Bismark). E passemo a l’aereomodelismo. Le scatole de montagio le gà pressi bassi, naturalmente con riferimento ai modèi in legno. EI tenpo de costrussion el poI risòlvarse in ‘na sera. EI divertimento l’è costituì soratuto da la colorassion che la ga da darghe credibilità al tuto. Par i modèi volanti, in bàlsa, fodrà de tela con strutura a trancio, se ghe ne cata de famosi, come el triplano del Barone Rosso. Se poI equipagiar l’aereo con un motor a elastico, ma se poI farli andar, come i alianti, anca a volo lìbaro; fati in balsa legerissima e rivestì de carta come i è, i poI restar in aria anca dei minuti!
Quanto a l’aereomodelismo a motor, qua, a parte i pressi elevadi dovudi a radiocomando, servomecanismi ecc… ghe voI soratuto ‘na bona capacità de pilotagio. Un precursor in ‘sto canpo l’è l’aereo a volo vincolà; cioè a “guinsalio”, atraverso un fil che ghe consente al model de volar in tondo con de le acrobassìe spetacolari e che, oviamente, el vien a costar de manco.
Ma el discorso, qua, l’andarìa pitosto distante e el spassio l’è quel che l’è! ‘N’ultima parola sui diorami; un tipo de modelismo svariadissimo che ‘l conprende spesso, torno al model senpre oviamente picolo, el panorama ‘ndo, ne la realtà, l’ogeto el se move, in sto tipo de modelismo se vede la fantasia del modellista parché, salvo rari casi, i diorami i è sempre pèssi unici pensadi da lu.
Wanda Girardi Castellani
