L’Angolo de la Wanda – Luglio bis 1992 – “Vèstete che ‘ndemo in ‘Rena”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Vèstete che ‘ndemo in ‘Rena”.

Nissuno à mai stabilì quando che i l’àbia fabricàda, ma i storici i dise che la sia del primo secolo avanti Cristo; insoma la g’à da ‘verghe più de domila ani!
E in tuto sto tenpo, a cosa è la servida? Ci èi stà i spetatori e ci i atori?
In epoca romana, tanto par scominçiar, i scalini i era separà in vari setori. Intorno a l’orchestra e comunque viçin al palco, gh’era l’ordine senatorio. Nel 67 a.C.. Na lege Roscia, dovuda al tribuno L. Roscius Otho, la riservava po’ i 14 ordini de posti sucessivi ai cavalieri. Par quanto concerne el popolar ne i scalini più alti i era ciamà “i muliebri” in quanto destinà a le done. Subito sòto, separà da un mureto, i scapoli, mentre ai maridadi era riservà i posti de sòra ai cavalieri.
Ancó, inveçe, la division de i sentari l’è na question de palanche; in platea ci ghe n’à tante e più in su che se va, catemo quei che ghe n’à de manco.
I primi spetacoli in ‘Rena i è stà de sicuro “gladiatori”; un spetacolo pitosto crùo; na specie de becarìa criticà parfin alora e adiritura condanà da Seneca ne le so letere a Lucillo. Gh’è da zontarghe che in quel tananài spesso ghe tolea da dir parfin el publico, lassando in canpo morti e feridi. I gladiatori i g’avea na vita curta ma l’era el proverbial “giorno da leon”. I vivea e i se alenava nei Ludus Publicus, specie de caserme-palestre dipendenti dal municipio. A Verona sto conplesso el se trovava probabilmente a du passi da l’anfiteatro come testimonia na iscrission catà a Castelvecio e ‘dèsso conservà al musèo maffeiano. Le paghe i èra alte; dai 50.000 ai 200.000 sestersi a l’ano, più na tòla da Trimalcione e l’amirassion de le done, matrone conprese. De le 4 iscrissioni de gladiatori che ne resta a Verona, do le se riferiva a “reziari” e una a ‘n “secutor”, tipico aversario de i reziari. La fantasia de la gente mete ne l’Arena, prima de l’edìto de Costantino (313), ànca el martirio de i cristiani, scominçià soto Nerone e deventà sistematico soto a Decio, Valerio e Diocleziano (249-305). Nel 304, tra la giostra de i scalini, gh’è ‘ndà a morir i santi Fermo e Rustico, mentre el vescovo Procolo che in quel’ocasion l’avaria vossudo ànca lu afrontar el martirio, dato che l’èra vecio stracanpìdo l’è stà solo ciapà a capelàde e tolto de soia. Intorno al 942 i dà notissia de ‘n fastoso torneo in onor de le nosse de Galeotto Nogarola. E passemo a l’epoca medioeval quando i “spetacoli” i èra costituidi par la magior parte da “duelli giudiziali” o “giudizi de Dio”, nonché da condane capitali. Se podarìa far finta de scandalisarse par i gusti de sti nostri avi se noialtri no fùssimo quei che se diverte da mati con Rambo o con i film “wester” a “un franco al morto”!
Dopo l’incendio del 1172, e el teramoto del 1183, par un tòco la ‘Rena l’è servì solo da cava de piere par far su altri edifici, fin che nel 1221 Rizzardo de S. Bonifacio no’ l’à tacà a giustarla. Ma nel 1223, durante un “torneamento” a la presensa de ‘n mar de publico la tera l’à scominçia da novo a balar con conseguenti ancora pèso croli. Da alora par rivedar da ste bande n’altra manifestassion publica se deve passar al 1245 quando, nel giugno, è vegnù in visita Federico Il con na brigola atorno de altri papavari e parfin co’ ‘n’elefante. Dopo Ezzelino la nostra ‘Rena l’è stà teatro de na strage: el 13 de febrar 1278 i g’à brusà in mèso 200 eretici patarini caturà a Sirmion del Garda. A dir la verità, Mastino I el s’avea limità a tegnerli in preson ma, morto lu, so fradel Alberto I’à fato canpagna rasa, guadagnandose da Papa Nicolò III, come premio, el castel de IIIasi. Sul finir del 1200 penso che in ‘Rena no’ se fasesse spetacoli de rilievo. EI spetacolo semài I’èra de fora con le “spurcis puelles” (overo le pùe) ‘Iogà nei còvoli, sensa equo cànone, ma con tanto de capucio e canpanel (par no èssar confuse co le “putte onorade”). L’anfiteatro se lo versèa al publico solo in qualche ocasion speciale come le nosse de Antonio De La Scala con Samaritana Da Polenta.
Nel 1382 gh’è notissia de na grandiosa “giostra” con “castello d’amore” ma nel giugno 1405, dopo che Verona l’è cascà soto el dominio veneto, la Serenissima nei novi statuti (1475, libro IV cap. 5657), I’à stabilì che ‘l gran teatro a l’aperto el restasse serà, con in più la proibission de portarsene via dei tòchi. Solo nel 1541 le “segnorine” i è stà costrete a far fagòto e finalmente l’anfiteatro l’à tacà a recuperar la reputassion.
Tra el1580 e el 1600 s’à tegnù diversi bei tornei e giostre de nobili come quela del luni grasso 1599; un spetacolo ch’è passà a la storia come quel’altro del 29 magio 1622, dito “la quintana” in onor de Girolamo Carnaro, con i cavalieri in costume da re e inperatori, draghi, maghe, carosse e cavai; un “colossal” rovinà da n’aqua a sece roèrse. Ma… drio l’eterna roda del tenpo, èco che se vèrse el fastoso 1700 in paruca e guardinfante e un programa tuto novo come la “cacia de i tòri” tra tòri e cani adestrà. L’ultima giostra la vien fata el 20 novenbre 1716 in onor del principe eletor de Baviera, co’ la regia del Maffei. Ma, oramai, i spetacoli in ‘Rena i tàca a canbiar el “look” e se vede conpagnie de comici, saltinbanchi, saltadori de corde e balarini, drami e dramoni mitologici su palchi e casoti. In quel periodo gh’èra na stranba usansa; al sóno de l’Angelus i atori i coréa a ripararse drio le quinte cantando l’Ave Maria par po’ tornar tuti al so posto a seitar el spetacolo. Probabilmente sta storia l’èra ligà a la nota legenda che voI fabricà la ‘Rena dal diàolo che dopo aver laorà tuta la note el l’à lassà po’ inconpleta la matina, spaentado al sóno de le canpane (èco parché de la cinta esterna rèsta solo ‘n’ala).
Nel 1800 riva Napoleon e parte mèsi tesori d’arte de la çità! Fortunatamente la ‘Rena no l’à podù portàrsela drio!
In onor del “picerèla” se rifà la “cacia dei tòri” (15 giugno 1805) e parfin na “cacia a l’orso” (un progenitor de quel del Baldo?) (18 genar 1807). In quel’epoca in ‘Rena se fasea parfin el zugo de la tonbola.
Par ‘verghe el preludio de i spetacoli lirici de ‘ncò, se g’à da rivàr al 24 novembre 1822, con un spetacolo (Sacra aleansa) conposto da Gioacchino Rossini. Po’, n’altra parentesi teatral con varie conpagnie e nel 1866 un memorabile carosel con foghi artificiài par festegiar l’union del Veneto. Un’altra storica manifestassion l’è stà quela che à visto na gara de aerostati, un de i quai el portava el nome del famoso Duca Zuliani (quel de la pignata). Me nono el me contava che in ‘Rena s’à parfin esibì el grande Buttalo BilI (colonel Cody) coi so indiani, bufali e cavai. Altre gare de bestie, velocipedi ecc… e finalmente, nel 1913, Giovanni Zenatello, Ferruccio Cusinati e Tullio Serafin i g’à ‘vù l’idea de utilisar el nostro bel anfiteatro par de i spetacoli lirici. I à provà, da vari punti de la cavea, l’acustica e i s’à inacorto che l’è tuta come na grande parfeta recia… cussì è partì la prima esecussion de l’Aida profitando ànca del çentenario da la nassita de Verdi. De quela stajon operistica n’è restà na gustosissima cronaca. I spetatori i à inaugurà par so conto la tradission de portarse drio roba da magnar e da bear e i botegari i à fato afari d’oro. Un osto de corso porta Borsàri l’à vendù in un giorno mile fiaschi de vin e un pistor 750 chili de parsuto a drio el qual ghe sarà ‘ndà anca na bela brìgola de paneti. S’à visto rivar in çità: treni speciali, caravane e spedissioni con prenotassioni da tuto el mondo. Tra el publico: Boito, Puccini, Mascagni, Illica, Pizzetti, Zandonai, Montemezzi, Sonzogno, Ricordi… çentoçinquantamila franchi de incasso par sera! Tuti i giornài del mondo à magnificà la grandiosità del spetacolo e naturalmente tuti i poeti veronesi i à cantà l’avenimento.
De tanto in tanto, ‘dèsso, sora el nostro bel palco pàssa spetacoli minori e spesso discutibili… ma l’è ancora quando che va in sèna l’opera che se desmissia la maraveia de le maraveie! Su le gradinade, meiara e meiara de candeline ‘npissade le par speciar la volta celeste in tera. La musica, linpida come un cristalo va su a onde lente fin a ‘npenir tuta la grande terina, strabocando ‘nfin ne la piassa Bra… e ci se la perde? “Dai, Nina, vèstete che ‘ndemo in ‘Rena!”.

Wanda Girardi Castellani