L’Angolo de la Wanda – Luglio 1992 – “Madre Giuseppina Bakhita”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Madre Giuseppina Bakhita”.

Madre Giuseppina Bakhita canossiana “moreta” el 17 de magio, in piassa San Piero, a Roma, a i onori de i altari.

Madalena De Canossa, la fondatrice de la so Congregassion, l’è veronesissima; nata qua nel 1774 e qua morta el 10 de april 1835; un vènardi de passion! Santa, po’, la gh’è deventada bastansa de recente; el 2 otobre 1988.
EI palasso ‘ndò l’è vissuda par tanti ani se lo poI ancora amirar in corso Cavour, a du passi da l’arco de i Gavi; un palasso stupendo, co’ ‘l so cortil d’onor da la balaustra del qual, come in un quadro de Bernardo Bellotto, te se verse ai oci el nostro verde Adese che, passando soto al ponte scaligero dopo aver specià el castel voludo da Cangrande 2°, el curva su le Regaste perdendose, al de là del sguardo, traverso ponte Cadena… su…par la tedescarìa.
In alto, in fila sul fronton de la grande fassada, gh’è de le statue candide tra le quali el can del celebre motto: “Quando questo cane mangerà queste ossa, finirà casa Canossa”. Ma tornando a la nostra Madalena; ela no’ l’à podù concretisar el grande sogno de poder portar in volta pa’ ‘l mondo la parola de nostro Signor; sogno che però l’è stà po’ realisado da le so suorine canossiane dele quali, un s-ciapo za nel 1860 l’è partido par Hong Kong e po’, via-via, altre; par l’India, la Cina, el Giapon, le Filipine, l’Australia, Singapor, l’Argentina, el Brasile, Usa, Africa, ecc… ‘Desso la so Congregassion (che, tra l’altro, la rege ànca la me parochia; S. Maria Adolorada, in borgo Trieste) dal 17 magio la po’ contar ne le so file ànca na Beata, “moreta” come el nostro grande Vescovo San Zen.
La bela, grande cerimonia l’è stà fata a Roma, in piassa San Piero e l’è stà el nostro Papa, Giovanni Paolo II a elevar ai onori de i altari Madre Giusepina Bakhita, canossiana. La storia de sta suorina negra l’è semplice epur edificante e maraveiosa come la più bela tra le rosarie.
Nata nel vilagio de Olgossa (Sudan) nel 1869 in ‘na fameia pitosto benestante, l’è stà, dopo ‘na sorela de 5 ani, rapì anca ela, a soli 9 ani e più òlte po’ venduda e riconprada. L’à soferto violense e maltratamenti de tuti i colori fin che nel 1883 no’ l’è stà comprà da l’agente consolare italian a Khartum, el qual el l’à a so volta cedù a na fameia de Zianigo, frazion de Mirano Veneto (VE): i signori Michieli… par farghe compagnia a la so butina. Con questa, a la fine, l’è stà afidada a le Madri Canossiane che regea la Casa dei catecumeni a Venessia ‘ndove che, istruida a la fede cristiana, I’à conossù quel Dio del qual, fin da butina, ànca se confusamente, I’avea sentì la presensa confortante.
Nel 1890 I’à ricevù dal Patriarca de Venessia i sacramenti, del Batesimo, Cresima, Eucarestia e nel 1893 l’è entrà nel novissiado de le canossiane, ciapando i voti tri ani dopo.
A Schio, ne la comunità de via Fusinato ando che fin a la morte avegnù l’8 febrar 1947, I’à fato scola, butine e genitori i ghe ciamava afetuosamente, la “Madre moreta”. L’avea imparà a parlar veneto, tanto che a Dio la usava ciamarghe “el Paron”, e a ci ghe domandava come la stava, la rispondea: “Come voI el Paron!”. Se poI quindi, a bonarason, dir che l’è ‘na santa nostra; na santa veneta!
Ai funerai, prima assè che i lo decidesse in Vaticano, la gente l’à dimostrà de èssar za convinta de la so santità, fasendose intorno a meiara, comossa e devota, a la bara.
Poco tenpo fà, a Schio, mons. Luciano Dalle Molle l’à scrito de ela sul boletin del Domo:
“Sta creatura, umanamente insignificante, la sarà proclamada Beata dal Sommo Pontefice”.
Insignificante? Noialtri riussimo a vedarla solo vardando in su… ma tanto in alto da farse vègnar el storsicòl! L’è stà ‘n esenpio de umiltà, bontà, senplicità, fede e obediensa; un angelo ch’è passà su la tera; la “nostra” tera veneta.
Domìnica 17 magio, da la piassa San Piero o da le nostre case, semo stà in tanti a dimandarghe de tegnèrghe sòra ‘na man!

Wanda Girardi Castellani