L’Angolo de la Wanda – Giugno bis 1994 – “MONUMENTI DEL… CURUCUCÙ”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“MONUMENTI DEL… CURUCUCÙ”.

Ultimamente è vegnù fóra un libro che ‘l descrive i pèso monumenti d’Italia e anca Verona la g’à l’onor de èssarghe citada par via del monumento a don Giuseppe Chiot, sistemà nel Largo  omonimo. Andèlo a védar ma riparève el muso parché l’è propio un pugno ne l’ocio! Che ‘l fusse ‘n’anima lónga l’èra anca vera e ve lo posso assicurar mi che l’ò conossù de persona,  ma da questo a rapresentarlo come ‘na tajadèla, ghe ne passa! Par no’ parlar po’ del naso che se ‘l fusse stà propio cusì la perpetua l’avarìa podù, ‘péna che ‘l spuntava da la canonica, butar zo el riso par catàrselo còto ‘na òlta drénto tuto el resto. El pòro don Chiot, infine, no’ se capisse parché, piegà da banda, el g’abia da spiar dal mureto ci vien da la via dei “Scalsi” e… con  quel’aria da “zero-zero-sete, trascurà dai bródi”. Ma i autori del libro no’ i g’à da ‘ver fato el giro de la çità, se no de material i ghe n’avarìa catà fin che i voleva, e ànca de mèio, a scominçiar da Paolo Caliari; “el veronese”, sistemado nei giardini de la Giarina, dopo ‘na  prima  locassion a santa ‘Nastasia. I l’à rafigurà sentà su ‘na scragna, mèso fóra e meso  drento, come se ‘l g’avesse ‘na çerta  tension nel star sentado. Mi, nei me versi, sensa tante perifrasi l’ò comiserà: “Ah, pòro Paolo, co’ le maruèle!” (pardon!). Tra le altre dai tenpi dei tenpi i gà rangià el penel, cusì l’è lì, pien de schiti de colombo e nero come un marochin, col police e l’indice postadi, che’l par un prete ‘ndrio far la predica! In cao a ‘n altro giardin; quel de via Nino Bixio, zo dal ponte Garibaldi (ex ponte dei strachi) gh’è Cesare Lombroso, insigne alienista, apostolo del rinovamento carcerario,  che ‘l  pararìa sentà su ‘n cesso, tanto più che co’ la man drita el tien un afàr tondo come un ròdolo de carta igienica. In efèti l’è ‘na crapa da morto ma, magnada come che l’è, no’ se la individua miga massa ben. La tension dei liniamenti e la posission dei piè, nonché la vesta tipo “da camara”, i completa la poco elegante inpression! Ponte de le Navi; e qua se pol védar el Re Umberto 1° ‘sassinà a Monza el 29-7-1900 da l’anarchico Gaetano Bresci. ‘Stó  monumento l’è stà inaugurà nel 1906 a la presensa de la regina Margherita a la qual  dovemo  el mèio comento: “Pòro Berto… a Monza i l’à ‘sassinà, ma a Verona i l’à rovinà!” In efèti, più che  “el Re buono” el par un sensar da vache tuto sodisfato d’avér  combinà un bon afàr. E rivemo a S. Zén ‘ndó se cata el monumento ai nostri bersalieri; monumento che l’è el spasso dei mostri (buteleti) che sistematicamente i conpleta la testa del soldà, cassandoghe ne la boca, che la g’à la misura giusta e l’è de conseguensa ‘na tentassion iresistibile, un pomo o ‘na patata. Ma a vìnsar l’Oscar de la brutúra l’è propio el “Vincitore” (autor Han Jin Sub), regalà a la Verona dei mondiali, nel 1990, da la çità  de Carrara e colocà de fronte ai cancèi del Stadio da mane ignote e sacrileghe in te ‘na note stròa (nera).  Qualchedún el g’à scrito sóto “el tufatóre”… qualchedún-altro “el  trufatóre” (vista l’onda dei sudéti mondiali) ma, a vardarlo ben el pararìa più che altro el “deposito” de un qualche can fóra de misura. E, par adesso, co’ la promessa de parlarve prossimamente de le fontane… me fermo qua! Passemo po’ a le fontane; la più bela l’è quela che gh’è in borgo Trento, ai giardini de via 4 Novembre. Subito, za a l’inaugurassion, batesà dai veronesi “fontana dei seciari”. Quela de la Brà, inveçe, dono de la Çità de Monaco, baratà da Verona co’  la bela statua de Giulieta, opera de N. Costantini e relegà dai cruchi in un canton de vicolo, la par la schena de ‘n porco risso. Passa, quando che gh’è aqua, ma quando l’è al suto l’è ‘na roba che fa da piànsar… e mi che son inamorà còta de la me Verona propio parché no’ me scapa propio da piànsar… me fermo qua!

Wanda Girardi Castellani