L’Angolo de la Wanda – Giugno bis 1992 – “Ugo Stefanutti la poesia de l’universo”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Ugo Stefanutti la poesia de l’universo”.

Tacà in tinel, in belamostra, go un quadreto che, tra tanti, el me sa particolarmente caro. Incornisà gh’è pochi ma splendidi versi a incapelar na sugestiva panoramica de la piassa San Marco, in sepia: “negli spazi stellari / emerge la marea / delle gondole / attonite infittiscono / le metèore / inglobano proteggono / la città galassia”. Disegno e poesia i è opara de un orno quantomai sorprendente; medico, siensiato, poeta, pitor, scritor, docente universitario e che altro? Parlo de Ugo Stefanutti; “l’ultimo Doge de Venessia”, come, con penelada sicura e intivada, el là definì Andrea Colasanti in un articolo del 1988, vegnù fora sul Coriere de Roma. A tute ste atività, a tuta na corona de titoli, uno più inportante de l’altro, metemoghe a zonta che l’è, de Venessia el più grando e convinto inamorado e bisogna dir che la perla de l’Adriatico l’à catado in lu el più brào e originaI de i cantori. EI quadreto el me l’à regalado propio Ugo, 15 e più ani fa, dopo na so memorabile conferensa su la storia e l’importansa del dialeto veneto a la qual era seguida na dission de poesìe… anca mie. Me ricordo che rassa de impression m’à fato sto omo, de na cultura oceanica, sior, tra l’altro, de ‘n fàssino e n’eloquensa rari, Ancò, a sti sentimenti de simpatia e amirassion profonde posso ligar ànca a quel de l’orgolio de poderlo ciamar, e da ani, “un amigo”.
A metarse elencar tuto quel che l’à fato e ‘l stà fasendo par la siensa e la cultura, no’ ghe saria da ‘mpenir n’articolo, ma un “tòmo” da na diesina de chili; me limitarò quindi a le robe più recenti: Presidente de l’Associassion Scritori Italiani, par el Veneto; Presidente del Premio “poesia cosmica” e del Premio “Leonardo, Çità de Coneglian”. Nel 1975 el ghe n’à fondà pura un altro, rivà a la 15ª edission, che ‘l porta ‘l nome de so papà.
L’à publicà na barca de sagi e libri, tradoti in varie lingue. EI dirige tre note colane editoriali; dò dedicade a la storia de Venessia e una a la storia de la mediçina. L’è autor de diverse racolte de poesia e de prosa, tradussioni dal greco, dal latìn, tedesco, francese, inglese ecc… L’è caposcòla de la “poesia grafica” (le parole drento al disegno) e de la poesia cosmica (l’omo de fronte ai ritmi de l’universo). La so composission l’à rapresentà Venessia in tuto el mondo e i è ànca presenti in varie importanti antologie… po’ no me adèntro nel canpo de i riconossimenti, inumarevoli, nassionai e estari, senò el discorso el se farìa un “passio”.
Che altro dir de sto personagio co la “P” maiuscola? Da poetessa posso solo e çerto in maniera inadeguada, parlar de la so poesia, na poesia che forsi più de ogni altra la riciama el significato de sta parola… “poesia”… poesia come creassion; fiola de l’anima. A lesar quela de Ugo te se vèrse davanti, palpabile, l’universo e te par de ‘verghe a un trato i brassi cussita larghi da poderlo ‘brassar e i oci da penetrarlo tuto fin ‘ndò che ‘l riva… se mai el g’à da ‘ver na fine!

Wanda Girardi Castellani