L’Angolo de la Wanda – Giugno 1995 – “Ferruccio Tagliavini”… Ànca la so dolçe voçe la s’à smorsà par senpre.
…a cura di Graziano M. Cobelli
gcobelli05@gmail.com
Quatro Ciàcoe: da Verona
“Ferruccio Tagliavini”… Ànca la so dolçe voçe la s’à smorsà par senpre.
Dies’ani fa, grassie a l’amigo Luciano Pollini, g’ò ‘vu modo de conòssarlo anca mi, in ocasion de ‘n premio nassional de poesia. Me ricordo che durante el pranso, sentà a la me destra, el m’à domandà de ripetarghe, solo par lu, la poesia ch’i m’avea premià. Gran artista a parte, l’ò catà, come omo, dolçe, gentile e a la man. Ferruccio Tagliavini, tenor de grassia da la voçe dal smalto d’oro, bon de incredibili filadure e co’ ‘na facilità de frasegio più unica che rara, 34 opere in repertorio, l’à scominçià la cariera nel 1938, a vint’ani, sostituendo nel teatro de Firenze, in Boheme, un noto tenor spagnolo protestà dal publico.
In 40 ani de cariera, l’à pestesà po’ tuti i più çelebri palchi del mondo in un cressendo de sucessi fin al 20 de magio del 1981, quando, co’ ‘L’amico Fritz” de Mascagni el g’à dà l’adìo a le sène, al Carnegie Hall de New York.
EI publico el Io ricorda soratuto nel repertorio lirico legero (indimenticabili le so interpretassioni ne “L’Elisir d’amore”, ne “L’Amico Fritz”, ne “L’Arlesiana” e nel “Werther”) ma, grassie al so inpegno e a la seria, longa preparassion, l’à podù èssar splendido anca in opere come “Il Ballo in maschera”.
Do, i è stà i elementi che à reso Tagliavini un grandissimo tenor; la belessa de la voçe e el gusto che l’à portà senpre a rifiutar ogni facile abandono a la lessiosità, al “grassioso”, resistendo ai adescamenti de ‘n tinbro soave come pochi; un gusto del qual l’à dado prova propio in Rossini. Nessun cantante, come lu, el g’à ‘vu tanto rigor de stile!
Oltre ai sucessi de teatro e discografici, dove che l’à afrontà anca un repertorio de cansonete e romanse, (ve le ricordèo “Non ti scordar di me”?) l’à girà diversi film, come: “Voglio vivere così” (1941), “La donna è mobile” (1942), “Ho tanta voglia di cantare” (1944), “Il barbiere di Siviglia” (1946), “Al diavolo la celebrità” (1949), “I cadetti di Guascogna” (1950), “Anema e core” (1951), “Vento di primavera” (1958) e el g’avea ‘vu, come maestri de recitassion, calibri come Ermete Zacconi e Memo Benassi! Ma, par saverghene de più, ò intervistà Luciano Pollini che, del grande tenor ‘sconparso a 80 ani ‘sto fine genar, l’è stà bon amico par tanti ani.
Alora, Luciano, quando I’èto conossudo?
“L’è stà nel 1972, quando ò fato parte del comitato organisador e de la giuria del premio “Arena d’oro”. L’incarico de contatar Ferruccio Tagliavini, premiarlo, i me l’avea dà a mi. Con la conossensa è nata po’ anca ‘n’amicissia che l’è durà fin che a darghe un tajo no’ è vegnù “la siora co’ la rengaja!”.
Quando ghe l’èto vu ospite in casa tua?
“Quando el me circolo lirico l’à organisà la comemorassion de Giovanni Zenatello, qualche ano dopo, a la presensa de la fiola Nina de Giulietta Simionato, Ruggero Orlando (altro me bon amigo) ecc…, sicome se voleva anca Tagliavini, ancora ‘na òlta l’ò contatà mi e propio in quel’ocasion l’è sta’ ospite in casa mia par la prima òlta. In seguito ghe l’ò vù ancora a Cadidavid e più volte. Gh’è da dir che propio in quel’ocasion el circolo l’à ciapà el nome de “Amiçi de la lirica Giovanni Zenatello”. Paraltro, Tagliavini l’è stà po’ invità a vari premi de pitura cusi più volte g’ò vu l’onor de èssar premià de le so mane”.
Ferruccio l’è stà’ anca invità a consegnar i premi in concorsi de poesia. “Si, e se te-te ricordi, el t’à premià anca ti, in un concorso da le parte de Parma. Te l’ò presentado mi e semo stà insieme”.
Quante òlte àlo cantà in Arena? “‘Na volta sola, nel 1954, nel “Mefistofele” de Boito e in quel’ocasion el g’à ‘vu arènte, oltre a la grande Magda Olivero, a sere alterne; n’altra Margherita d’ecession: Maria Callas. Quel stesso ano, in ‘Rena cantava anca so moier Pia Tassinari in Aida, par la prima òlta nel ruolo de Amneris. E, a proposito de la Pia, na dona come poche, ultimamente, za novantenne, la s’à curà de l’ex marì, restà solo dopo che l’èra stà colpì da ictus, prima in clinica e po’ ne la so casa de Reggio Emilia, guidando la macchina, avanti e ‘ndrio da Faenza, ‘ndò che la vive. Anca con ela g’ò ‘na bona amicissia e vago spesso a trovarla”.
Me par però che Tagliavini, anca se’l s’avea sposà po’ la so ex alieva Isabella Tramaglia, che la g’à dà anca ‘na fiola, Barbara, ancò ventene, el sia restà senpre in boni raporti co’ la Pia.
“Non solo, ma el I’à stimà sora de tuti e el gh’è stà riconossente. A mi el m’à confidà, comosso fin a le lagrime, che l’è stà la più grande “Mimì’ che sia mai vissuda; unica, inconparabile!”.
Ò leto diverse biografie de Tagliavini, ma no’ risulta che I’abia cantà la Traviata.
Inveçe sì; con la Clara Petrella nel ruolo de Violetta”.
Grassie, Luciano, la to testimoniansa l’è stà pressiosa!
Lo sò che la perdita de ‘n amigo, specie cusì, l’è come ‘na cortelada… ma, come ti, ‘sto dolor lo sentimo in tanti; tuti quei, specie de la nostra età, che à amado e ama el teatro lirico e i so grandi interpreti.
Wanda Girardi Castellani
