L’Angolo de la Wanda – Giugno 1992 – “I “PENDUTI” de Santa Anastasia”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“I “PENDUTI” de Santa Anastasia”.

A Verona no gh’è “cicerone” che prima o po’ no’ ‘l porta el s-ciapo de turisti, ai quai l’è in dotassion, ne la bela cesa gotica de Santa Anastasia a farghe amirar el famoso afresco de Antonio Pisano, deto el “Pisanello”.
Sto capolaoro el se trova adesso sora la porta de la sagrestia, ne la capela Giusti, tra altre opare d’arte e curiosità, come: el timon de ‘n “sciabecco” turco, portà come ex voto dai crociadi dopo la vitoria de Lepanto e ‘l stupendo coro eseguì nel 1493 da Lorenzo da Santa Cecilia. Purtropo I’afresco el se va tòco a tòco sbiadendo, tanto che el bel paesagio de sànca l’è za del tuto sparì. Paraltro, come che ‘l dise Arturo Scapini nel so bel volumeto: “Tuto l’insieme che resta el par vegnù fora da quel mondo incantà che l’è stado el gotico internassional”. Viçin al grande caval bianco lussuosamente bardà, spìca, incornisà da i rissi biondi, la facia de San Giorgio e ‘I dolçe profìl de la principessa Trebisonda, soto al bareton carateristico, tra un sfondo de fiori e pìcoli animali. Ma… sul canton in alto, a sanca, i oci i tènde a sbrissiar via; quei du impicadi co’ ‘l col storto i è cussì fora de posto. I è un pugno nel stomego e forsi propio par questo se çerca de ignorarli. Gnanca la “guida” più perfeta de l’Ente Turismo la te i nòmina. Ci èi, insoma? Parcosa el Pisanello l’à volù metarli lì a ‘sassinar l’insieme? Quei…, cari amiçi de “Q.C.”, i è i “penduti”, cioè du tra i disgrassiadi che à fato parte de la famosa congiura “de Pazzi”; el colpo de stato ‘ndò ch’è stà massacrà Giuliano De Medici e ferì Lorenzo EI Magnifico.
L ‘èra l’ano 1478. Organisadori principai de la congiura: Jacopo e Francesco Pazzi, l’arcivescovo de Pisa Francesco Salviati e Hernardo Handini; EI lògo: Santa Maria Del Fiòr, in Firense; un altro assassinio ne la catedral, come quel, a Londra, de Thomas Becket… e l’èra el 26 de aprìl, de domìnica, quando, durante l’elevassion, soto ben 18 pugnalade; menà co’ na violensa terìbile da F. Pazzi e da H. Handini, è cascà in un lago de sangue el bel Giuliano, vinçidor de tuti i tornei del tenpo ‘ndò che’l se presentava co n’armadura de argento da 8000 fiorini e ‘n’elmo disegnà dal Verrocchio. EI gaveva sul stendardo el mòto: “sensa pari” e i oci de le done i èra tuti par lu, ànca se i sòi i èra solo par la bela Simonetta Cattaneo; modela preferida del Botticelli.
Ne la confusion, inveçe, Lorenso, se pur ferido, l’è riussÌ a riparar in sagrestia, portando, cussÌ, fòra la pèle. ‘Pena la notissia de sto atentado l’è volà par Firense, el popolo infurià l’è córso a far giustissia somaria, al sigo “palle palle”… (tuto n’altra roba dal significato che ghe demo noialtri veneti). S’à salvà solo Jacopo Pazzi, girando el caval e fasendo “fete” a tuta bira. I altri i è stà tuti copà e po’ tacà via par el col a palasso vecio, ‘ndò ch’i è restà par un tòco, secondo le abitudini medioevali, a monimento e ludibrio.
A farghe el ritrato ai “penduti”, impressionà se g’à messo tuti i mejo artisti de Firense, da Leonardo Da Vinci al Botticelli e… al Pisanello; sto qua ne I’afresco de San Giorgio e la Trebisonda e vatelapesca parcòssa propio in quel lì!

Wanda Girardi Castellani