L’Angolo de la Wanda – Giugno 1992 – “EL COLOR DE VERONA – I ninsói de Sanasàr”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“EL COLOR DE VERONA – I ninsói de Sanasàr”.

Ai me tenpi capitava spesso che noialtri buteleti i ne spedisse in farmacia a cronpar “na cartina de onbre de canpanìl” opura “un’onsa de muso pesto” (e se no’ ‘l ghe I’à… el me lo pesta). A le butele che no gavea a l’orisonte na speransa de nosse, se usava dirghe: “Te te maridi coi ninsói de Sanasàr” e magari, par cargar el scherso, i le spediva dal paroco de sta cesa a farse dar la “dota” de ninsói. Ma sti ninsói i gh’è sul serio; ligadi intorno a le colone de l’ingresso al sagrà, deto “la rotonda”, soltanto che, ahimè, i è de piera. Disemo subito che l’architeto Antonio Saletti che nel 1688 I’à serà la cesa nel tornaconto, no’ ‘l ghe entra che par caso. L’origine de la tradission la va çercà ne la devossion a San Biagio vescovo del qual, ne la capela in fondo a sinistra, gioiel architetonico del fiorido çinqueçento veronese, gh’è le relichie che ogni ano i ghe fa basar ai butini par protègiarli da i mali de gola. Sta capela l’è stà fabricà coi fondi de na confraternita nata par la venerassion del santo taumaturgo; na confraternita che la registrava i più bei nomi tra i “vip” veronesi. A sta gente dovemo in parte i tesori de sta bela cesa de la qual me risservo de parlar in seguito più a longo. Le casse però, par quanto che se ghe ne spendesse, le restava senpre pitosto ciòsse e alora i à pensà ben de ofrir “do grassie” de oto ducati ciascuna par farghe la dote a do butele, poarete ma de sana virtù, de età sora ai 15 ani, iscrite inoltre fra i devoti de San Biagio. Sta opara l’è partì verso el 1540 e l’è ‘ndà ‘vanti fin quando I’istitussion no la s’à stuada in seguito a la pèste del 1630, par la qual gavea lassà le strasse bòna parte de i confradei.
EI culto de San Biagio l’è ancora in auge ma la bela usansa de le “grassie” l’è finì ne la càneva fonda; viva solo nei schersi del primo de april, ànca se a Verona l’uso de farghe la dota a na butela selta a estrassion, grassie a vari làssiti aministrà da la congregassion de carità, l’è durada fin a la prima guera mondial. Come nel 1500, la “pulzella” la doveva “frequentar la dotrina cristiana e far ogni mese la Santissima Comunion, se-nò la “grassia” la sarìa decaduda.
De sti tenpi, anca el scherso dei “ninsói de Sanasàr” l’è sparì nel tananài pien de smog de la nostra malinconica çiviltà che no conosse più ne fantasia, ne tantomanco la poesia. Resta però i ninsói, sia pur con quintai de polvar drento le pieghe, a ricordar una de le tante nostre coloride tradissioni nate quando che, tra i tanti proverbi, se ghe ne tegnea da conto sora tuti, uno: “Fiói e ninsói no i è mai massa”. Ancò el discorso el va ben par i secondi…, de solito “firmati ” e col “clic-clac”, ma par i primi, lassemo pèrdar che no me scapa da piànsar!

Wanda Girardi Castellani