L’Angolo de la Wanda – Gennaio bis 1993 – “Nino Pozzo – L’ultimo buratinar – Dies’ani fa Gepeto l’à molà zo par senpre la scaiarola”.
…a cura di Graziano M. Cobelli
gcobelli05@gmail.com
Quatro Ciàcoe: da Verona.
“Nino Pozzo – L’ultimo buratinar – Dies’ani fa Gepeto l’à molà zo par senpre la scaiarola“.
Quando che vago a l’albergo “Ai du leoni”, dopo aver saludà me marì che da 12 ani el stà de casa su par la scala drio el sacrario de i morti in guera, fago altri du passi a sanca e spedisso un baseto verso ‘n’altro calto, par-aria, da ‘ndo el me amigo Nino Pozzo, l’ultimo buratinar de Verona, el me soride da ‘l so ovaI mèso sconto da ‘n masseto de fiori de plastica impolvarà.
L’avea conossù nei ani trenta quando a Santa Lussia andavo a torme i regài al dopolavoro de l’Asienda Eletrica Comunal, dove lavorava me papà come capoturno. Par coronar la festa, i ciamava tuti i ani el cav. Nino Pozzo co’ ‘l so “teatrino del mondo piccino”. E ci, tra noialtri veronesi de ‘na çerta età no’ se ricorda come mi, “Fasolin nel soteraneo co’ ‘l morto” co’ le fogàre da le quale saltava fora el diaolo tuto vesti de rosso… e po’: “la pianela persa ne la neve”, “Barba blu”, “Sandron, re dei mamaluchi”, “Fasolin, dotor par forsa”, “Fasolin e la fata Morgana” “Fasolin al centro de la tera” e tute le altre maraveiose storie da ‘ndo spuntava fora parfin la comedia de l’arte, la storia, i eroi de guera, i personagi de De Amicis e quei de Manzoni?
Spesso i “atori”, el Nino, el se li faseva lu, mentre a vestirli, fin che l’è stà al mondo, gà pensà so mama, e mèio de’ ‘n Valentino o de’ ‘n Cristian Dior.
Mi, da buteleta, gavevo ‘na simpatia particolar par uno dei so buratini: la morte. Apena che Nino el girava la schena, sbrissiava drio la tenda, ‘rafava la crapa da morto e andavo e scondarla soto a la me carega da ‘ndove quel bon omo, passiente come e mèio de Giobe, el vegnea a torsela, do, tre òlte par sera. Finì la guera, sicome i l’avea visto in “orbace” (come se no’ ghe fussimo stà tuti), i l’à messo da parte… in “castigo”, ridusendolo a la fame. Par star a gala a la manco pèso, con un caretin, ando el caricava i feri del mestier, e ‘l so aiutante Toni Bogoni, l’andava ne le corti passando po’ co’ ‘l piatin… che spesso el restava ùdo.
No’ podendo far altro, gò scrito a un giornalista de l’Arena, fiol de ‘n colega de me papà: Giuseppe Faccincani, che anco el va par la magior, ma che ‘lora l’èra a l’inissio de la cariera. Faccincani el gà subito dedicà a Nino, amigo anca suo, un articolo a tuta pàgina “El Noschese dei buratinari”, dimandando a ci de dover, el riconossimento e l’aiuto che l’èra doveroso darghe a quel’artista e omo de indiscusso valor. El Comune a ‘sto punto l’è intervegnù con un incarico al “Teatrin”; un lavoro stabile nei, alora nassenti, campi-gioco; lavoro che Nino l’à seguità a far fin a quando nostro Signor no’ l’à pensà ben de ciamarlo a intrategner, inveçe de i butini in tera, i angeleti e i cherubini; in paradiso.
Dal 1923, quando l’à scoperto de averghe la vocassion de dedicarse ai sogni de i butini, l’avea scrito quasi dosento testi de sucesso e l’èra deventà, par noialtri de la me provincia, più classico e importante de Topolino, de Bibì e Bibò, de Mandrake… El gavea el particolare dono de cambiar voçe; una, diese, çento volte… passando dal “trombon” de n’orco al violin de “Rosaura”, co’ ‘na facilità unica. Ai so spetacoli se divertiva i butini ma anca i genitori e i noni e ghè da dir che se tratava senpre de spetacoli altamente didatici con de i boni insegnamenti morali e de vita.
Mi gò ‘vu el privilegio de averghelo par amigo, da quando ero butina e fin a l’11 genar de l’83, quando, in ‘na stanseta de l’ospedal de Negrar, assistì da i amiçi lmerio Mariotto (el bravo cantautor veronese, po’ deventà anca el continuador de la so opera) Paolo Zoppi, Toni Bogoni, mi e altri, serenamente l’à serà i oci ne la paçe del Signor.
A quei tempi, tanti tra i poeti veronesi i l’à cantà con versi sentidi; tra i so veci butini… Berto Rossignolo e mi. Ma nel me caso scrivar de lu l’è stà particolarmente facile, Nino l’è stà el me più grande e caro amigo d’infansia, ligà a un periodo belo e distante che ‘l seguita, cola perseveransa insistente de ‘na mosca, a tornarme ciaro inamente… dolçe ma anca tremendo quanto più la cossiensa, con altretanta perseveransa la me bisbija amaramente, che no’ ‘l ritorna più… mai più.
Wanda Girardi Castellani
