L’Angolo de la Wanda – Febbraio bis 1994 – “Macéte”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Macéte”

“Veronesi… tuti mati!”, se usa dir, e che la me gente la fusse alegròta e maturlana, senpre pronta al scherso, a la bòta de spirito e svelta a catàrghe su tuto, òmeni e robe, la piega ridicola, l’èra vera, anca se ‘ncó vardandosse intorno gh’è da pensar che de veronesi ruspanti no’ ghe ne sia più; tuti in mucia a magnar el radécio da la parte de la sòca o emigradi ci sà ‘ndove par farghe posto a st’altri… foresti, drughi, sensa ‘na frégola de umorismo e pitosto antipatici. Mi me ricordo ben çerte “macéte” ancora in òlta fin ai ani “50” e me ricordo, come se le avesse conossude, quele dei ani ’10 e ’20; protagoniste de le rosarie e de le barselete che me contava i méi, specie ne le longhe sere de inverno, quando la TV l’èra “de-là-da-vègnar” e, se anca pitòchi de schei, èrimo siori de fantasia. El “Torototèla”, el “Tòmaci”, el “Fraca”, “Germano da l’ocarina”, la “Lussia dei brocoleti”, “Romeo dei spassacamini”, el “Salata”, “Popolo bue”, el “Tàmbara”, don “Padèla”, “Toni del Grapa”, “Garibaldi in coa longa”, Gigi “merda”, Carleto “léca”; coloridi come la taolossa del Ligabue con un punto in comun; el gòto! El Torototèla (Ottaviano Finetto) l’èra el cantastorie de la me infansia. El vegneva in corte con ‘na specie de trespolo che manovrà el ghe faséa bàtar i piati a ‘na fila de paiassi. Le so tiritère le finiva senpre con: “E mi me piase la polentina, specialmente col bacalà… torototèla, torototà!” Nei ani ’30 i so personagi preferidi i èra el Negus e la “negussa”. I versi el gheli scrivéa so papà su le tòle de le ostarìe. Pòro Otaviano… dopo, la guera l’è ‘ndà a laorar in Belgio e a 26 ani el g’à lassà le péne drénto ‘na fornasa. El “Fraca”, inveçe, (Luciano Fracca), el se esibiva par le piasse tirando un par de tiràche de fero o sbregando massi de carte. El contava che ‘l g’avéa ‘vù i aplausi anca del zar de Russia e de l’imperador del Giapón… e noialtri mostrici (buteleti) ghe sigàvimo “buuuuuum”. Ma le so storie i èra propio vere; el Fraca l’èra stà ‘na stela del circo de Buffalo Bill che ‘l l’avéa scriturà quando nel 1906 l’èra vegnù in ‘Réna par la seconda òlta. De Germano da l’ocarina me ricordo solo che ‘l sonava senpre la marcia trionfal de l’Aida co’ la qual el vegnéa de note a farghe la serenada a le butele de la me strada. Pòro Germano, quanti bocài che i g’à udà su la suca! Ma el personagio più belo l’è stà de sicuro el “Tòmaci”, overo Luigi Tomici, morto nel 1939 e passà a la storia soratuto par via dei “gòti” dei quai l’è stà più Re lu che no fà l’Alboìn! El faséa el fachin de stassion e el portava a pié le valise dei clienti, de solito a l’Academia. Se andè a vardar vedarì che fóra de ‘sto hotel gh’è dó banchete de piera scavade in meso par tuta la longhessa e la larghessa. Beh, in quel buso, fato aposta dai paróni, tute le matine i camarieri i ghe udava l’aqua par inpedirghe al Tòmaci de sentarse lì a far i so comissi da imbriago spólpo. El metéa i brassi in diagonal e el sigava a tuto buso: Alè ! Ma su ‘sto personagio i ghe ne conta par i porchi. Quando che ‘l famoso dotor Spàngaro, molàndolo da l’ospedal, el g’à proibì de béar vin… l’è passà davanti a l’ostaria sensa fermarse, ma fati un par de passi el s’à dito: Brao, Tòmaci! e sicome che te sì stà brao, torna indrio che te pago un quanto! ‘Na òlta sul ponte Navi un francese el s’à estasià: “Trà-zó-lì!” (buta-zó-li) o almanco cusì l’à capì Tòmaci che convinto che ne le valise del cliente ghe fusse n’altra Isolina Canuti fata a spessatin, el l’à butàde in aqua. Imbriago e meso assiderà, ‘na matina de inverno i l’à catà su ‘n marciapié e par desgiassarlo i l’à infilà in un forno da pan. L’è finì anca in “gatòi” a causa de un cagneto! Senpre pién de fredo co’ la so giachetina slisa e le fasse militari, l’avea incontrà sul ponte ‘na siora col cagneto coerto da un bel paletonçin de pelicia. Rabià par quela che la g’à parso ‘na ingiustissia nera… l’à ciapà la bestia e el l’à butà in Adese. Ma la più bela l’è stà quela dei balini: ‘Na note l’è ‘ndà in ostaria poco prima che i serasse e l’à dimandà el solito “pesante liger” (vin e gasosa). La paróna la ghe n’à udà un bicer sensa acórsarse che nel fondo de la bòssa gh’èra i balini e l’erba vedriola che l’avea usà par netar el “véro”. Pò, l’osta l’à pensà de averlo copà, tanto più che i è stà du giorni sensa védarlo. Quando Tòmaci el s’à ripresentà, belo, alegro come senpre, l’à subito dimandà un altro gòto “come quel’ultimo”… parché no’ ‘l ghe n’avea mai beù de meio! El popolino po’ el g’à zontà che quando l’à savù la storia dei balini, l’à dito: adesso capisso come mai fasendo vento ò sbusà le braghe come un passapaste! Del Salata; giornalar de la Brà, completamente analfabeta, me ricordo quando i boni amiçi, nel ’38, i g’à sugerì el titolo de testa de l’Arena: “Mussolini deposto!”. Dopo un quarto d’ora el pòro, inocente Salata i l’à ‘npachetà e portà ai “Scalsi” (carcere). Davanti a qualsiasi titolo el sigava “Inportante molto!”: “I sansionisti, saranno sansionati!”… “60.000 morti abissini… in fuga!” e via cusì. Popolo-bue, inveçe, l’èra un inbriago rabioso, el faséa i so comissi in piassa Dante e in final el se cavava le braghe. El tacava senpre ne la ‘stessa maniera… “popolo bue…! “Romeo” (Luigi Scalabrini) noto antiquario fine ‘800, che tuti i ani el ghe ofriva in Sotoriva el pranso ai spassacamini, par via de schersi l’è stà el numaro uno! Quando che l’à savù de dover morir, el s’à fato portar a l’ospedal co’ ‘na portantina a brassi e andando al San Caterina, l’à saludà sul Liston tuti i amiçi: “Ciao… ciao… vào a farme ciavàr!! La Lussia, don Padèla, Toni del Grapa, Garibaldi che ‘l tajava i cavéi co’ la scudèla, el Gigi che ‘l vendéa in via Massini “l’uselìn del Paraguay… che ‘l canta senpre ma no’ ‘l magna mai”, el Carleto che, finìo el gòto, dopo averlo “sugà” co’ ‘l déo el se lo ciuciava de drito e de roèrso; ‘ndov’èi finidi? Con lóri à tirà i sgherléti el spirito montebaldin de Bartoldo. I me dirà che ‘l vegnéa-su el più de le òlte da l’asprin de le càneve e che le “macéte” i èra, infondo-infondo, gente sempre in bala acuta. Sarà anca véra… ma almanco, oltre a no’ far del mal, i te metéa in corpo l’alegria! ‘Dèsso al posto dei ‘nbriaghi gh’émo i drogadi; e provè ancora a rìdar, se sì boni!

Wanda Girardi Castellani