L’Angolo de la Wanda – Febbraio 1994 – “ASS. SARDI NEL VENETO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“ASS. SARDI NEL VENETO”

Festa granda, poco tempo fa, par i sardi de casa nostra e par noialtri che li stimemo e semo orgoliosi de ‘vergheli amiçi. L’è stà giusto diesani fa ch’i s’à riunì in ‘na associassion qua a Verona, soto la presidensa del dr. Efisio Maxia, recentemente scomparso. ‘Dèsso al so posto gh’è Maurizio Solinas.
Daprima, ne la basilica de san Zen gh’è stà la messa in lengua sarda, po’, a la sera, el grupo “Amiçi del folclor” de Nuoro i à dà spetacolo al Centro “Mons. Carraro” con bali, musiche, cante e le carateristiche inprovisassioni poetiche de ‘n “tenores” ecessional.
A la dominica, in sala Goethe à coronà le manifestassioni ‘na conferensa dibatito del prof. Bruno Rombi sul poeta Sebastiano Satta e la scritrice nuorese Grazia Deledda.
À verto el “matinèe” l’Assessor a la cultura, dr. Meocci. Po’, el presidente Solinas I’à introdoto el prof. Rombi, ilustre fiol de la Sardegna, docente universitario, noto scritor, colaborador de la RAI, che tra le tante inportanti òpere, testi scolàstici ecc…, I’à scrito anca un bel sagio, apunto, su la celebre conteranea. De Sebastiano Satta, nato nel 1867 (4 ani prima de la Deledda) I’à dito che l’à cantà in versi le tribolassioni de la so gente. Satta, avocato, I’à fato parte anca lu del movimento cultural de Nuoro, deta l’Atene Sarda. L’à subì I’influensa del Carducci e l’è stà comunque el più grande tra i cantori de la so isola.
Grazia Cosima Damiana, fiola de ‘n Procurador legale, Sindaco de Nuoro, poeta, morto nel 1892, e de ‘na dona repressa, infelice e insodisfata, in quanto andà sposa sensa amor de ‘n omo più vecio de vint’ani, l’è stà ‘na feminista “ante litteram”; infati, tute le protagoniste de i so romansi, diversamente da la mama, più o manco le s’à ribelà al maschilismo che, specie in Sardegna, I’èra inperante.
L’èra autodidàta parché, oltre a la 4° elementare a quei tempi, ne la so isola, a ‘na dona no’ i ghe consentiva de ‘ndar. La cultura la se I’à fata sui libri, lesendo tuti i classici. A 12 ani I’à composto la prima poesia e poco dopo i primi raconti, editi su un giornal de Roma.
La s’à guadagnà, nel 1926, el Nobel, come “gran poeta del travaglio morale”

Wanda Girardi Castellani