L’Angolo de la Wanda – Febbraio 1993 – “L’ultimo scarpar – (Calsarel – scarpolin – scricio – savatin – calsolar, ecc…)”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“L’ultimo scarpar – (Calsarel – scarpolin – scricio – savatin – calsolar, ecc…)”.

‘Na bela sera, stufo de tacar tachi, cusir tomaie e incolar sotopie, tra profumi pòco imparentà co’ ‘l “sanèl numaro çinque”, l’ultimo, autentico, altamente professional, scarpar de Veroneta, l’à deciso de sèrar-su botega, ciaparse la so magra pension d’artesan e andàrsela a spèndar a l’ostaria, sensa più orari, ordini, contrordini e lamentele. Cusì l’à sbaracà l’incasinadissimo logheto, consegnando i ultimi laori e butando finalmente ne le scoasse la brìgola de scarpe impolvarà, mai ritirade… o parché i proprietari i se n’à desmentegà o parché i s’à trasferì a quel paese ‘ndo che la moda, sempre stessa da’ ‘l prinçipio de l’umanità, la dèta: “camisòto bianco e pie rigorosamente descalsi”.
‘Dèsso, el sior Fausto Pasocco, belo, elegatin, soridente e finalmente in paçe co’ ‘l mondo, te lo cati a tute le ore a far filò davanti a ‘n banco, co’ ‘l so brao gòto in man. Mèio par lu… ma mi, personalmente, me son spaentà e miga pòco. Le scarpe, ancò, le costa un bàito e le dura da Nadal a San Stefano, specie i tacheti da dona che se i magna nel giro de ‘n chilometro (500 metri, se la strada l’è a saleso).
Me ricordo che qualche ano fa de scarpari ghe n’èra uno par ogni pissà de can… Beh, sì e nò che ghe n’è restà 5 in tuta la çità. Girando e girando ò visto un par de boteghe con tanto de aria condissionada e porta blindà. I laorènti (paraltro, cossiensiosi) i se presenta in càmise blu o verde e sula porta se lese: “la rapida”, opur… “tachi rapidi”. 6/10.000 franchi anticipadi par incolarte du tocheti de corame par sotovìa. E speremo che i dura (parlo dei scarpari moderni) se no, par qualche taco consumà, se dovarà butar via scarpe da 100.000 e passa franchi.
O intervistà el me vecio scarpar: par cosa è lo ‘ndà in pension cusì bonora?… e parcòsa prima no’ àlo insegnà el mestier a qualchedun? 1°… no’ se càta aspiranti scarpàri! 2°… amesso che ghe n’avesse catà uno, avaria dovù darghe el stipendio intiero par tuto el tenpo che gavaria messo a ‘nsegnarghe, perdendoghe drio del tenpo anca mi. Se po’ se fusse tratà de ‘n marochin o de ‘n moro, pèso ancora: avaria dovù insegnarghe pura a parlar come mi par poderse intèndar. Tra stipendio, contributi e madone varie, me gavaria volù almanco du testoni (milioni), ‘na cifra che n’ò mai ciapà gnanca da solo in un mese de sole e tachi”. Dirla che el ragionamento no’ ‘l fa ‘na piega! Intanto i artesani i sparisse un drio de l’altro e co’ ‘l tenpo l’è prevedibile che se salvarà solo i bandari (idraulici), parché con quel mestier se deventa in pochi ani più siori de i seìchi del petrolio.
Adio, dunque, vecio scarpar ruspante che laorava sensa mole, levigadori, cusitrici, presse e mastici miracolosi co’ ‘i quai ‘nco i te taca i tachi in du minuti (e in altri du po’ te li perdi pa’ strada). Çerto che le boteghe “rapide” i è nete, destrigade e lustre, miga come che l’èra quela de Fausto; mufido çimitero de scarpe rote, tute in malinconica mucia a spetar ‘n posto in cassoneto. EI descheto el s’à areso a n’elegante taolon longo un par de metri e la scràgna a ‘n moderno caregoto a scaleta. In te ‘n canton, fa bela mostra ‘na machina par cusir co’ ‘l brasso mobile come quel de ‘na gru. “Tachi rapidi”… ma ci è più bon de farte un par de scarpe su misura? Dal mio “vecio”, spetando la lustradina de pragmatica, ghe scapava ‘na qualche barseleta… Da discussion de polìtica… le ultime novità del borgo, notissie de “corni”, bagolessi, cusì, a la bona. “Lu”, vardando le scarpe, l’èra parfin in grado de farghe el ritrato, al cliente: caratere e situassion finansiaria…; giustando scarpe par ‘na vita se finiva co’ ‘l deventar parfin pissicologi!
I scarpari de ‘ncò no’ ‘i gà bisogno de ‘nparar come che se taca ‘na pèssa su ‘na sòla; roba de altri tenpi, quando che un par de scarpe le te dovea durar ani e ani. I èra un “ben” parfin par i siori, tanto che so fioi i portava ‘nca lòri, sandali de istà e pòlacheti d’inverno, solà più òlte, mentre i poareti i andava a piè descalsi o in sgàlmare de legno, a seconda de la stajon.
Sì… el ga ‘vu rason el sior Fausto a mandar a remengo baraca e buratini ànca se po’, par negar la nostalgia e la rabia pa’ sto mondo amaro, ghe toca spèndar la striminsida pension a l’ostaria.

Wanda Girardi Castellani