L’Angolo de la Wanda – Dicembre 1993 – “Tenpi de fòle”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Tenpi de fòle”.

I giovani i ne tòrcola, noialtri veci, parché gh’emo spesso in boca la frase “mi me ricordo”. EI fato l’è che semo come ‘na fruàda locomotiva a vapor che, pantesando, la se strapega in còa ‘na drigola de vagoni, uno più pesante de l’altro; tuto el cargo de la vita, insoma, ben o mal, ghe I’emo par dedrìo! A mi, na sera de mesi fa, vardando el giro d’Italia, m’è tornà-su da la càneva fonda de la mente, ‘na çelebre frase de Mario Ferretti, radiocronista de quel del 1949: «un omo solo al comando. La so maia l’è bianco-celeste», e se tratava de Fausto Coppi guando che I’è rivà solo su ‘na çima. Erimo tuti incolà a la radio e, dato che no’ gh’era gnancora la TV a coparne la fantasia, ognuno se podea inventar el “video” del campionissimo, curvo a rancar sui pedài, magari tra bufere de neve. E, a proposito de TV, tra el 1955 e ‘I 56, la me casa (I’unica in via S. Marta fornì de un bel casson de TV, marca Geloso) ogni giovedi sera la se inpeniva come un ovo. I se portava le careghe, le scragne, el vin, la fogassa, la polenta brustolà e la sopressa. Dio, che entusiasmo par “Lassa o radopia” con quel giovanotin biondo, mèso ‘merican, che ‘I disea un saco de boiade ma che I’èra bon de metarghe el pear indosso a tuta I’ltalia! I me salta ancora in testa come tanti diaoleti a mola, quei nomi: Lando Degoli, co’ ‘l so controfagoto, la Edy Campagnoli, la signora Longari, grassie a la qual el Mike nassionale I’à sbarà la più bela castronà del secolo (oltre a quela de Pio VI, deventà Piovi), e po’: la Bolognani che la savea tuto su le partìe de balon, el “dandy” Marianini, esperto de moda, ecc…
E rivemo al 1963; giusti trent’ani fa, quando ghe n’è sucesse de tuti i colori! EI primo grande avenimento l’è stà la morte de Papa Roncalli, eleto ne l’Otobre 1958, a setantassete ani. Un Papa de transission, i I’avea definì; come a dir che I’èra destinà a durar da Nadal a S. Stefano. lnvesse, quel preton de canpagna, in manco de 5 ani I’à canbià (in mèio) tute le carte in tòla, metendosse a livel de la gente, sensa più “pluralis maiestatis”, flabèi, careghe gestatorie e, quel che più conta, instaurando un dialogo co ‘l resto del mondo, comunisti compresi. Ci èlo che se podarà desmentegar quel so discorso del 11 otobre 1962; un discorso fato “a brasso”, sensa le solite scartofie parecià da cissa-ci? In piassa S. Piero gh’ era co’ I cor tuto el mondo, quando, con quela voçe da malà che la parea za vègnar da l’alto del cel, I’à dito: «quando che tomarè e casa, fèghe ‘na caressa ai vostri butini e disìghe che l’è ‘na caressa del Papa!».
Mi penso che tuti, cristiani e non, in quel momento i à capì che a parlar I’èra un Santo. Ghe mancava poco a morir… giusto 5 mesi prima de ‘n altro grand’omo; John Fitzgerald Kennedy, el più famoso de i presidenti americani, dopo Lincoln, copà a le 12,30 del 22 novembre 1963 a Dallas (Texas). De lu, ultimamente, i ne n’à dito de còte e de crùe, soratuto che ghe piasea le done, specie quele “larghe de mànega”. Beh… deograssia!… almanco I’èra un omo sul serio; un genere, de sti tenpi, pitosto raro! Par el resto, pò, mi penso che se no’ i g’avesse fato la pèle (propio parché I’èra un presidente iluminà, con un programa politico de largo respiro, e non solo par I’ America) el sarìa riussì a cambiarghe la facia a I’intiero pianeta. L’èra un vero “citadin del mondo” e ‘l l’à dimostrà a Berlino el 26 giugno 1963 quando, davanti al muro che da du ani el tajava in do la çità, I’à dito, co’ la voçe rota da I’emossion: “Ich bin ein Berliner!” (io sono un berlinese). E me piase citar un’altra so frase che tuti dovaressimo incolarse sui ociài (specie quei che i ghe I’à spessi come du culi de goto): «No’ stè a dimandarve cosa l’è che ‘l Paese el poi far par voialtri, ma pitosto cosa I’è che podì far voialtri par el vostro Paese». In quei ani, a parlar co’ la voc;e de I’amor, de l’onestà e de la rason, gh’èra anca Martin Luther King, leader nero american, premio Nobel par la pace. Nel discorso che I’à fato el 28 agosto 1963 davanti a ‘na marea de gente, tra l’altro I’à dito: “Semo vegnudi a Washington par tirar un assegno; i diriti par tuti i fioi de Dio, de ‘verghe le stesse oportunità, secondo la promessa de la Costitussion americana… un assegno che l’è ancora scoerto!». Ma l’apostolo de la non violensa, anca lu, come Gandhi, l’è finì ‘sassinà, a soli 39 ani, el 4 de april 1968. Ne resta però el dono pressioso de ‘ste so ultime parole: «fasine pura quel che volì; noialtri continuaremo a amarve!».
Cristo, ma dove èi ‘n dà quei spiriti grandi, quei tenpi che ‘dèsso i par de fòle?
Visto che noialtri veci ghi emo serasu nel caselario del sarvel, lassè, butèi, che almanco, come ‘ndele fòle, se i tornemo de tanto in tanto a ricontar; “gh’èra ‘na òlta… gh’èra…”

Wanda Girardi Castellani