L’Angolo de la Wanda – Dicembre ter 1992 – “STORIA SACRA – El Presepio”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“STORIA SACRA – El Presepio”

Secondo i evangelisti, Gesù l’è nato ai tenpi de Erode.
Luca el ne informa inoltre che Augusto l’avea ordinà “che se fasesse un censimento su tuta la tera”; un laoro che ‘ndava in òpara ogni 14 ani ne l’inpero romano, del qual, tra i altri, fasea parte la Palestina. Per magior precision, el zonta che propio alora era governador in Siria (altra colonia romana) Quirino, Publio Sulpicio Quirino. Gh’è po’ un argomento astronomico che ‘l segna la nàssita de nostro Signor: l’episodio de i “Magi”, vocabolo persian che ‘l sta par “òmeni de siensa o mèio astronomi” (che al tenpo i era ànca ‘stròloghi). I Magi, donca, i vegnea da l’Oriente e gh’è da dir che i orientài i credea ne l’aparission de ‘n nòvo astro ogni òlta che nassea de i grandi personagi. La tradission la parla de na cometa e ultimamente s’è pensà a la Halley. Questa però, visto che l’è na “periodica” (la passa ogni 76 ani) fasendo el conto a ritroso, no la risulta èssar stada, ne se ga notissia de altre. L’ultima l’èra conparsa 17 ani prima e la sucessiva l’e passà adiritura 66 ani d.C. E alora? L’è stà Keplero, a fornirne la spiegassion. Infati, el grande astronomo matematico che el 16 dicembre 1603 l’avea osservà la congiunsion de Giove con Saturno nela costelassion de i pessi; un fenomeno de grande efèto, l’à calcolà che la stessa roba la sia sucessa, par tre volte ne l’arco de ‘n’ano, giusto nel 747 A.U.C. Sta ultima data po’ l’è ‘l fruto de ‘n novo altro calcolo dopo che s’à stabilio che ‘l monaco Dionigi “el piccolo” l’à sbalià apunto de 7 ani quando che da “A.U.C.” l’è passà al “a.C.”; 747 de Roma e non 753.
Ma tornando ai “Magi”… Gaspare, Baldassarre e Malchiorre, bituadi a studiar el cel, quando che i à visto el scominçio de sto fenomeno celeste i l’à interpretado, a la luce de le conossense astrologiche de l’epoca, come el segno de la nàssita de un Re de giustissia, un grande profeta, forse el stesso Messia, ne la tera de Israele. Infati, i Fessi, i rapresentava Mose e el so popolo, mentre Giove l’èra la stela dei Re e Saturno quela de i giusti e de i profeti. Eco che alora no’ i è miga rivà par caso a la grepia de Gesù, dato che i saveva perfetamente el verseto de la Bibia: “Oh tu Betleme…”, ecc…
Ma tornemo a l’argomento in question: el “presepio”.
Tuto ga da èssar scominçia in un momento dunque de l’ano 747 de Roma, quando che Maria l’à ricevù un particolar saludo da l’Angelo, po’ come tuti savemo, gh’è stà el gran evento!
Da quel giorno è rugolà via più de dòdese secoli fin che a Assisi un giovane frate incantà dal fato de ‘n Dio che s’èra fato omo, par smòar la devossion de i cristiani in un’ epoca che, par andar in Palestina no gh’èra che du mèsi, el cavalo e i piè, I’à deciso de rapresentar in casa la Natività nela maniera più realistica possibile. EI ghe n’à parlà a Papa Innocenzo III e dopo averghene otegnù el parmesso, nel 1223 drento a l’eremo de Greccio durante la note de Nadal S. Francesco l’à organisà na rapresentassion vivente de la nàssita de nostro Signor co’ la partecipassion de la popolassion del paeseto reatino. Propio in quel’ocasion I’à pensà de inserir nela grota, co’ la sacra fameia, anca ‘n bò e ‘n musseto e forsi l’idea la gh’è vegnù al Santo da la Bibia; infati, 800 ani prima de Cristo el profeta Isaia l’avea nominà ste do bestie: “el bò el conosse la casa del so Signor. EI musso, anca… inveçe ti, Israele, no!”. Inoltre, l’asino l’era el mèso de locomossion de i pitochi e Maria e Giusepe, che siòri no’ i d’èra, i g’à da èssar rivà a la gròta (o stala) fasendoghene uso. Quando ‘l bò, l’èra anca alora na bestia comune par laorar la tera e el podea quindi èssar presente ne la stala ‘ndove ch’è vegnù al mondo Gesù. L’è pura normal che ‘l bò e l’asino i abia contribuì a scaldar el lògo; tenpo fa ànca ne le nostre canpagne se passava intiere serade al caldin de l’àrfio de le bestie, nele stàle. Eco alora el presepio e, par conpletar el quadro, gh’è da dir che no deve èssar stà de inverno; ricordemose che l’angelo l’e ‘ndà a sveiar i pastori e, el l’à catàdi che i dormiva co’ i so armenti a l’aperto. Tra l’altro, essendo Betlemme a circa mile metri de altitudine, se fusse stà de dicembre i saria stadi al coerto. La data del Nadal l’e stà sèlta dopo par far coincidar la gran festa de la nàssita del Redentor co la festa pagana del sol.
Ma noialtri metemoghe pura nel nostro presepio co’ la grota o la capana, i palassi, el mus-cio, I’aqua che score traverso i mulini, el fògo de i bivàchi e i pastori a brassi verti denansi a i angeli che vola intorno a anunciar el feliçe evento… anca i gòli de giasso e ‘n bel” tapeto de candido bonbaso che ‘l fa vegnar i sgrisoloni de fredo a vardarlo slusegar ai sguissi de la fiama de i candelòti in tutù rosso-oro.

Wanda Girardi Castellani