L’Angolo de la Wanda – Dicembre 1992 – “NOTISSIARIO – CON S.E. MONS. ATTILIO NICORA, ARIA NOVA IN VESCOVADO”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“NOTISSIARIO – CON S.E. MONS. ATTILIO NICORA, ARIA NOVA IN VESCOVADO”.

 

Lassème dir che ‘dèsso a Verona gavemo anca un gran tòco de vescovo! Alto, largo de spale, pialà de pansa e, soratuto, simpatico, comunicativo, bon parlador, pien de idee e de bele intension e perfetamente calà ne la realtà polìtica e storica che stemo vivendo; qualità utili, specie de sti tenpi, ànca pa’ ‘n bon cristian.
L’ingresso a la diocesi veronese de Mons. Attilio Nicora, 55 ani portadi con baldansa, nato a Varese, laureà in giurisprudensa e in dirito canonico, ordinà sacerdote a 27 ani e za vescovo a 40 l’è avegnù dominica 27 setenbre e i so primi ati uficiài i è stà la visita al Santuario de la Madona de la Corona e a l’lst. de la Casa de Nazareth, a Ponton.
EI pranso, po’, el l’à fato a la mensa de i pitochi, a S. Bernardin, e la prima Messa, el I’à celebrà a le 15,30 in Catedral.
Noialtri giornalisti catolici gavemo ‘vù el modo e ‘l piaser de conòssarlo da ‘rente el 6 de otobre, a le 11, ne l’incontro drento el Vescovado, in un salon de l’Episcopio.
Tra i lanpi de i “flasch” e, el va e vien de i operadori de na diesina de emitenti televisive, S.E. mons. Nicora, afiancà da don Bruno Fasani, diretor del giornal “Verona Fedele”, I’à intrategnù cordialmente i rapresentanti de la stampa, dimandando, co’ ‘na bona dose de umiltà, el nostro aiuto, la nostra colaborassion e ofrendone nel contempo la sua, co’ ‘na disponibilità tanto
s-ceta da slargarne el cor.
Dai vari interventi s’à podù capir come tuti i senta la necessità de ‘verghe in Curia un uficio “stanpa” operante al qual poderse rivòlger, al bisogno, liberamente; un desiderio che S.E. I’à tolto subito in considerassion.
No’ tolendoghe gnente ai meriti de ‘l so predecessor, S.E. don Giuseppe Amari che avemo visto lassar la so carica con dispiaser, bisogna dar ato che el novo vescovo de Verona I’à dimostrà, za dai primi momenti d’èssar un omo moderno e ‘n prete eccessional con idee ciare e ciari intenti; quindi s’à capì ben che da lu se podaremo spetar tanto sensa pericolo de delusioni.
Benvegnudo, alora, Ecelensa! Pregaremo el Signor che ‘l ne lo conserva a longo e in bona salute… che, ànca a Verona, gh’è tanto da far!

Wanda Girardi Castellani