L’Angolo de la Wanda – Aprile 1994 – “Giuseppe Lugo… el tenor che à cantà ‘l vento”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Giuseppe Lugo… el tenor che à cantà ‘l vento”.

Me lo ricordo ben, el Bepi Lugo! Quando che l’ò conossù nel 1963 l’èra za ‘vanti coi ani. Da tenpo l’avea ‘bandonà la sèna de la lirica e l’ èra a du passi da lassar quela del mondo. Pura, soridente, in mèso ai tàoli, nela so “Vila Vento” a Custoza, l’ò catà proprio come, a teatro o al cinematografo, m’ èra imaginà che ‘l fusse; sinpatico, alegro e spiritoso, un veronese s-ceto… quel stesso che nel 1941, (28 febrar), a Livorno, ne l’ultimo ato de la Boheme vedendo che a Mimì seitava a cascarghe zo la testa par via de ‘n cussin massa basso, l’à cavà da la sèna un tacapani e ‘l ghe l’à infilà par de sòto!
La sua l’è stà ‘na gran bela rosària, pecà che l’è durà solo ‘na diesina de ani. L’èra nato a Rosolotti; ‘na frassion de Sona Veronese, el 18 giugno del 1899, cusì che, coi altri “ragassi del 99”, nel 1917, a soli 18 ani i l’à spedì in artilieria sul fronte de Asiago; «el general Cadorna l’è deventado pazzo / el ciama el ’99 che l’è ancora ragazzo». Dovea però rivar i ani trenta parché l’entrasse a far parte de la bela schiera nassional de i mèio tenori: Gigli, Lauri Volpi, Pertile, Schipa, ecc…
So papà, Piero, el g’avea ‘na botegheta de marcatin, con a zonta padèle, sòcoli, scòe, scogoleti; el tuto, spesso cargà su ‘n careto e tirà da ‘n musso, in olta par le piasse, a far marcà. Un lavoro che ghe parmeteva de mantègnar, oltre a la moier Elvira, ‘na brìgola de 9 fioi, 7 femene e du mas-ci, tra i quai el nostro Bepi che, purtropo, a soli 4 ani l’è restà sensa mama, morta de parto nel 1903.
Nei primi ani, sicome la polenta l’èra, ne le canpagne, el principal alimento, spanociando, la futura gloria del teatro italian el cantava a tuta vegna col conpagnamento de usèi, rane, grii e sigale e i bacani nei campi, par scoltarlo, i se fermava inpontelà a la vanga. EI 10 agosto 1913, col papà, sora al caretin, in coa de altre “Bugatti” a quatro sate, anca lu l’è vegnù in ‘Rena par l’Aida, volù e interpretà da ‘n altro grande veronese: Giovanni Zenatello e, tuto gazà, tornando a Rosolotti, l’avea dito: “mi vorìa far el tenor!”. Forsi proprio co’ ‘sta idea impiantà ne la suca, el s’à trasferì a Milan e, in atesa de vedar el sogno realisarse, par intanto el s’à impiegà ai tram. Par tuto el giorno el dovea spèndar la voçe drio a tre monotone parole: “avanti,… c’è posto!”, ma a la dornìnica, ne le ostarìe, jutàndose co’ la chitara, el ghe dava libaro sfogo a l’ugola e più de uno el g’à pronosticà: “te finirè a la Scala!”. Po’ gh’è stà la parentesi de la guera e, ahimé, ne le trincèe del Piave e de Asiago a cantar gh’era solo i s-ciopi e i canoni. Passà la tenpesta, a 24 ani l’è ‘ndà a çercar fortuna a Charleroi, in Belgio e li l’à catà la prima sventolà de fortuna ne la persona de Leon Gaudier, diretor de la socetà corale. Gaudier, inamorà de la voçe de Lugo, I’à scorninçià a sgresàrghela, ma el “nostro”, a la prospetiva de ‘n debuto, spaentà, I’è tomà a Milan. Lì, nel so apartamentin de via Padova, fin che, fasendose la barba, ‘na matina el cantava, a scoltarlo s’à fermà un funsionario de la Ricordi e, dopo un alternarse de speranse e delusioni, tra un mestier e l’altro, l’è aprodà finalmente nel studio del composidor Raffaele Tenaglia che, gratis, el l’à tolto a lession.
Bepi, che ‘l g’avea oramai 30 ani, propio in quel tenpo l’à perso l’enesimo posto de laoro; cussì, sfiducià, l’à piantà anca Tenaglia, ripartendo par Charleroi dove el “figliuol prodigo” l’à ritrovà Gaudier ancora disponìbile a interessarse de lu. ‘Sto qua el g’aveva ‘na fiòla de alora 13 ani; Suzanne, che 4 ani dopo la sarìa deventà la signora Lugo, dàndoghe al so, ormai celebre marì, ben 5 fioi.
Finalmente, nel 1931, el tenor de Rosolotti l’à debutà a l’Operà Comique de Parigi. La prima interpretassion l’è stà ne la Tosca, destinà a deventar el so cavaI de batalia.
Quel stesso ano, in otobre, l’è stà la òlta de Boheme, cantà, secondo la tradission de l’Operà Comique, in francese; solo i bis se podea farli in italian. Da quel momento, come in ‘na marcia trionfal, par Lugo se svolge longo e splendente el cao del successo: Ginevra, Liegi, Montpellier, Reims, Montecarlo, Londra, con “I pescadori de perle”, “Madama Butterfly”, “Rigoletto”, ecc… Po’, el 20 genar 1937… ècolo a la Scala de Milan in una memorabile “Tosca” e po’ in “Boheme” a la presensa, oltre che, toIta la mèio Milan, del conte Ciano e del 1° Ministro turco.
L’eco del sucesso scaligero, ghe porta sucessivamente scriture a Torin, Pisa, Modena, Prato, Firenze, Brescia. Naturalmente, tuta sta carga de gloria la g’à procurà, oltre che ‘na brìgola de amiradori, anca de le antipatie… prime fra tute quela de Gigli e de quel pearin de Lauri Volpi. Dopo i sucessi teatrali è vegnù anca quei cinematografici e discografici: diese, le òpere in repertorio (Tosca, Boheme, I pescatori de perle, Rigoletto, Faust, Mefistofele, la Butterfly, la Fanciulla del West, Turandot, Werther) tante, le incision con la “Polydor”, “La voce del padrone” e la “Cetra”. Tantissimi i concerti, in Italia e a l’estaro. çinque, i film de successo: “La mia canzone al vento” (1939), “Cantate con me” (1940), “Miliardi, che follia” (1942), “Senza una donna” (1942/43) e “Il tiranno del Garda”, sensa contar le bele cansonete che l’à reso celebri in tuto el mondo: “La mia canzone al vento”, ” Amore, diglielo anche tu”, “Senza una donna”, “Ritmo allegro”, “Milionario, che follia”, “Cavallino, corri e va”, “Piccola Mimì”, “lo non posso cantare alla luna”, ecc…
A Verona ghe l’emo avù nel 1937, in “Tosca”, e mi, anca se avevo ‘pena tacà a far la “prima”, me lo ricordo benon anca parché me papà el g’avea par Lugo una venerassion e ‘l ghe ne parlava fin a farse vègnar la poeia! Po’ l’è tornà l’ano dopo in “Boheme” e nel ’39 in “Rigoletto” e da novo in “Tosca”. Al teatro Novo l’à cantà in “Tosca” nel ’45 e l’è stà l’ultima òlta che l’emo sentì.
La so ultima rècita l’è stà a Liegi nel ’47, al Teatro Real; l’ultima “Tosca”, e po’ Cavaradossi, straco, tomà insicuro, bisognoso solo de chiete nel ritiro de la so Rosolotti, el s’à mutolì fin a la morte.
Dal 1960 al ’69, l’à vissù l’esperiensa del ristorador ne la “Vila Vento” de Custoza, proprio dove, in ocasion de la prima Comunion de me fiol Mirko, go ‘vu modo de conossarlo, almanco ne la nova sorascrita veste. Nel ’70, però, vendù el ristorante, l’è tomà a Milan, in via Dal Pozzo, in fondo a via Padova, dove ancora vive Suzanne Lugo, e lì, sensa preaviso, la matina del 18 setembre 1980 tuto d’un colpo s’à smorsà i rifletori e la “siora” l’à molà zo par sempre i cordoni del sipario.
‘Dèsso, 14 ani dopo, un grupeto de amiçi veronesi che no’ se l’à mai desmentegado, i à pensà ben de riportarselo a casa. Par ‘sto motivo i à formà un Comitato; promotori: Giuseppe Pezzini, de “Villa Vento”, el nostro Luciano Pollini, Renato Adami, Tiziano Bertagna e, in coa, ghe son anca mi. La Presidensa ghe l’emo dà a la soprano Magda Oliviero che l’avea cantà con Lugo in Boheme nel 1937 e nel 1940. La moier del Bepi la s’à trovà d’acordo su tuto e quindi, col parmesso suo e del comune de Milan. In sto mese (apriI) se fa la traslassion nel cimitero de Custoza, dove Lugo finalmente el riposarà ne la chiete de la so verde canpagna, inbrilantà da bine carghe de oro.
Co’ I’ocasion, el Sovrintendente de l’Ente Lirico Arena de Verona dr. Gianfranco Bosio, el n’à concesso, par un grande concerto, el teatro Filarmonico. A ‘sto concerto parteciparà i più bei nomi de la lirica de casa nostra e avemo invità el M.ro Andrea Gavazzeni, che l’è stà amigo de Bepi, co’ la moier, soprano Denia Mazzola.
EI museo del splendido teatro Filarmonico el g’à za in mostra uno de i costumi de sèna. Quei altri che Lugo l’à indossà ne le so interpretassioni, i è esposti nel ristorante “Villa Vento” de Custoza (tel. 045 516003) dove l’amigo Pezzini, che ‘l Bepi el l’à conossudo da ‘rente, l’è sempre pronto a far da Cicerone. Pa’ ‘l resto, la comemorassion la vegnarà fata dal musicologo dr. Carlo Bologna. Questo, in linea de massima, el programa!

I nostri “grandi” no’ se g’à da desmentegarli; bisogna seitar a farli vìvar drento de noialtri e insegnarghe, soratuto, ai nostri fioi, a conossarli e a amarli.

Wanda Girardi Castellani