L’Angolo de la Wanda – Aprile 1992 – “UN GRANDE DESMENTEGÀ – Antonio Cagnoli”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“UN GRANDE DESMENTEGÀ – Antonio Cagnoli”.

In via Quatro Spade, al n. 18, su la casa deta “de l’oroloio” gh’era na iscrission: “In sta casa, el 6 agosto 1816 è morto, d’ani 73, Antonio Cagnoli, ilustre nele matematiche e ne l’astronomia che, tra i primi, l’à fato deventar popolare co i so scriti”.

De la targa, come de l’orolojo, no se ghe n’à savù più gnente, finì la guera. La casa l’è in ristruturassion, soto l’ala protetiva del Ministero par i beni culturali, Tra quei muri, par che gabia dormì ànca, ospite del nostro ilustre astronomo-matematico, Napoleon Bonaparte, de passajo da Verona, Che ‘l grande “picoleto” el fusse ‘n amirador convinto de Cagnoli, lo dise la storia e se sà che ‘l s’avea fato premura de risarcirlo con 4000 franchi dopo che sto qua el s’era lamentà col so maestro, l’astronomo parigin Lalande, de i dani causà a la so casa, apunto, de via Quatro Spade, da na bonba francese cascà nei pressi durante le Pasque veronesi, In seguito, i dù i s’à incontrà a Milan e Bonaparte el ga fato al “nostro” n’acoliensa granda, tanto che dopo Campoformio el l’à adiritura nominà rapresentante del Gran Consiglio, ordinando de trasferir la soc. it. de le siense, da Verona a Milan. Inoltre el ga fato crompar a la Republica Cisalpina l’osservatorio personal de Cagnoli, portando anca quelo ne la çità de S. Ambrogio.
Cagnoli l’era nato ne l’isola de Zante nel 1743 da genitori veronesi. Me piase dir che l’è stà un fervente giacobin, amirador del me amigo Robespierre. Nel 1771 l’è ‘ndà in Spagna a farghe da segretario a l’ambassador veneto Marco Zeno ma nove ani dopo lo catemo (a 37 ani) tuto inpegnà ne la siensa che più gh’era congenial: l’astronomia. A Parigi l’è stà, come emo dito, alievo del Lalande e nel 1782 l’à fato costruir a so spese, in quela çità in pien farmento rivolussionario, un osservatorio coredà de strumenti fin alora sconossudi.
Nel 1785 l’è tornà a la so Verona dove che l’à instalà un altro osservatorio. Nel 1796 po’, in seguito de la morte del matematico Anton Maria Lorgna, fondador de la soc. de le siense, Cagnoli l’è stà ciamà a sucedarghe, presiedendola par 18 ani, parte in Verona e parte a Modena ‘ndò che l’è stà trasferida quando che Cagnoli l’à acetà ne la çità de la “secia rapìda” la nomina de professor de matematica ne la nòva scola militare.
Nel 1802 l’astronomo veronese l’è stà ciamà a rapresentar la scóla de i congressi a Lione par l’istitussion de la republica italiana e 5 ani dopo l’è tornà a la so Verona ‘ndò nel 1816 po’ l’è ‘ndà a studiar le stele da ‘rente e… da de sora. Se sa che l’è stà sepelido nel cortil del convento de San Bernardin ma, dato che recentemente propio lì è stà fato lavori de interamento de tubadure butando pararia tuto, l’è sicuro che de la tonba de Cagnoli no è restà gnente. Gh’è da na banda na mota de tòchi de lapidi e forsi rumando con passiensa e boni brassi sarà possibile catàrghene qualche sbecolo ànca de quela che un tenpo portava la scrita: “Antonio Cagnoli ilustre matematico e astronomo” co na frase laudativa in latin, stessa de quel’altra che se dovea trovar ne la sede de l’academia de agricoltura, siense e letere de Verona, secondo Ottone De Betta manoscrito de la session de archivio de stato.
Gh’è, ne la me provincia, de i stupendi afreschi astronomici setecenteschi, de na perfession tale da far sospetar che ‘l sia stà propio Cagnoli a ispirarli, dirigendoghene ànca l’esecussion e ne la biblioteca civica de Verona se poI consultar una parte de la so bibliografia consistente in ben 14 volumi, de astronomia, trigonometria, orologeria, geografia, meteorologia ecc…
Notissie de sto nostro grande desmentegà se le poI spulsar da na montagna de publicassioni sientìfiche de l’epoca ma, dopo i ani trenta e l’interesse del prof. Guido Valeriano Callegari (grande studioso veronese e cugnà, tra l’altro, de Umberto Boccioni, in quanto mari de so sorela Amelia) tuto par finì ne la càneva fonda ‘ndo che i me concitadini i usa sbàtar roba e gente, sensa pesar valori.
‘Dèsso però a ocuparsene con entusiasmo se ga messo i astrofili veronesi, tuta gente interessà a l’astronomia, quasi tuti giovani de età o almanco de spirito… quindi el discorso su Antonio Cagnoli l’è apena scominçià.

Wanda Girardi Castellani