L’Angolo de la Wanda – Ottobre 2013 – “El Concilio de Verona”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

El Concilio de Verona

Quei de la me generassion i se ricorda ancora de quando Giovanni XXIII nel lontan 1962 l’à inissià el “Concilio Vaticano II”, quel che l’à fato girar i altari e dir la messa in italian (al posto del latin)! A qualcuno che sa un po’ de storia ghe podarìa anca vègnar in mente el Concilio de Trento, quel de metà Cinquecento, o quel de Nicea, volù proprio da quel Costantino el Grande che nel 325 l’à liberalizà el cristianesimo.
Interessanti i Concili: ne i domila ani de storia de la Cesa ghe n’è stà una trentina, e tuti in poche çità: Nicea, Costantinopoli, Efeso, Calcedonia, Roma, Vienne (che no l’è mia la Vienna in Austria, ma la se trova in Francia), Pisa, Costanza, Basilea, Siena, Trento e… anca a Verona!
E proprio del Concilio de Verona vorìa parlarve, anca se in alcuni elenchi più che “Concilio” el vien ciamà “Sinodo”.

Federico Barbarossa

L’ano de grassia l’era el 1184 e a regnar sul Sacro Romano Impero l’era dal 1152 Federico Barbarossa, tedesco, che ogni tanto el vegneva zo da la Germania per combàtar contro qualche comune italian “recalcitrante” (principalmente el ghe l’avéa con Milan, ma el ghe n’à combinà de brute anca a Verona). L’era l’epoca de la batalia de Legnano e del famoso “carroccio”, che tra l’altro el vegneva conservà proprio ne la nostra cesa de San Zen.
Nel 1182 el papa l’era Lucio III, eleto un ano prima in conclave a Velletri e tanto malvisto a Roma, che l’avéa dovù scapàrsene via da la çità eterna e portar la Santa Sede a Verona.
El papa l’era a i fèri curti con el Barbarossa par tuta una serie de problemi in sospeso, par esempio la question de le investiture de i vescovi (che l’imperator el voléa fàrseli “fai da te”) e l’eredità de Matilde de Canossa, morta nel 1115, lassàndoghe meza Italia in eredità al papa… cosa oviamente che a l’imperator no la ghe andava zo!

Papa Lucio III

Un altro problema spinoso l’era quel de le eresie, (par esempio i catari) e quel de le crociate… ultimamente le cose a Gerusalemme no le stava andando par gnente ben, el Saladino (feroce) el stava vinsendo a tuto spiano e ghera bisogno de métar d’acordo i vari re europei (Barbarossa in testa) par organizar la rivincita (terza Crociata: ano 1189).
Par tuti ’sti motivi s’à reso necessario el Concilio.
El papa el risiedeva in San Zen e el “sinodo” el s’à tegnù principalmente lì. El risultato l’è stà condensà ne la bola “Ad abolendam” (in italian: “per abolire”, dita anca la “bolla di Ruscigli”) dove vegneva dichiarà uficialmente eretici i catari, i patarini, i valdesi e i arnaldisti… Inoltre vegneva indicà che da quel momento se podeva èssar processadi par eresia anca sensa testimoni atendibili: bastava solo un sospeto o una acusa anonima, sarìa stà compito de i vescovi efetuar de le ricerche (cioè inquisir) par védar se l’acusa la fusse vera o no; intanto fin a prova contraria l’acusà el vegnéa ritegnù colpevole e messo in preson e l’era a discression de i vescovi impiegar anca la tortura par farlo confessar.
Notemo che fin a prima valéa el “diritto romano” per el qual uno no el podéa mia èssar acusà in maniera anonima, ghe ocoréa de i testimoni atendibili e l’acusà el gaveva tuto el dirito de diféndarse.
Tuta sta legislassion in materia de eresie, stregonerie, ecc… la sarìa deventà quela che ne la storia la se ciamarà “la Santa Inquisission”. Perciò l’Inquisission l’è nata a Verona. Però atension: a l’inissio ’sto òrgano no l’era quel mostro che el sarìa deventà secoli dopo (specialmente ne la Spagna del 1500, a i tempi de Torquemada…) ma l’era solo un riferimento par l’ortodossia de la fede con el compito de “indagar”. Adiritura el triste rogo de 200 patarini che è stà fato in Arena (roba che l’era dal tempo de le persecussioni romane che no se ghe ne vedeva!) l’è stà fato più de un secolo dopo da Alberto I de la Scala, e l’Inquisission no la ghe centrava poco o gnente.
Nel 1185 Lucio III, che el gaveva za ben 85 ani quando l’era stà fato papa, l’è morto a Verona e l’è stà sepelì nel pavimento del domo, dove el se trova ancora adesso soto ’na piera tombale consumà da secoli de gente che ghe camina sora sensa saver che i sta caminando su un papa. Lucio III l’è uno de i pochi papi (una vintina su 260) che no i è stà sepelì a Roma.

Wanda Girardi Castellani

↓