L’Angolo de la Wanda – Ottobre 2007 – GUGLIELMO MARCONI

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

GUGLIELMO MARCONI

La magior parte de la gente la g’à i só eroi: ci un atór, ci un cantante, ci un zugadór de balon; insoma, qualchedun al qual ispirarse… qualchedun da copiàr!
Me fiol Mirco, par esempio, fin da picolo el g’à ‘vu a modèl GUGLIElMO MARCONI e ne l’età che de solito i buteleti i zuga a balón, a figurine o a coercioleti, lu l’èra za bon de costruirse ‘na radio a galena perfetamente funsionante.
Imaginarse come l’è restà mal quando in gita “pelegrinagio” a Sasso Marconi emo catà quasi in ‘bandono sia la villa-museo che la tonba dell’inventòr, in ‘sta ultima po’, piena de foie marse, ghe pioveva drento! Alora me fiol (in seconda elementare) de só inissiativa el g’à mandà ‘na leterina a “Epoca” denunciando ‘sta vargogna; ‘na letera scrita su fòi de carta de quaderno, letera che l’è sta stampà tuta ne la rubrica “letere al diretór”.
Guglielmo Marconi co’ la so invensiòn, I’à cambiado el nostro modo de vìvar. Basta metarse ‘na man in scarsela e tiràr fora el celulare par rendarsene conto… anca se no’ no ghe pensemo l’è ‘na radio anca lu… ‘na radio in grado de farne parlàr con tuto el mondo! Anca la television l’è ‘na radio! Se te sì in volo con n’arioplàn e te gh’è la sicuressa de rivàr a I’arioporto l’è grassie a la radio de bordo! Parfin i astronauti che i è andadi e tornadi dala luna, i comunicava con noialtri via radio!
Ma tornando a “Epoca”; s’érimo nel 1961 e la bela rivista de Mondadori che g’avea dà ospitalità a me fiòl la portava la data 31 Dicembre. Zontemoghe che, fedele ai só propositi, Mirco pò’ l’à studià e el s’à diplomà in telecomunicassiòni. Alora la rivista riciapàndo el discorso sospeso dodez’ani prima, el 5/8/73 la s’à conplimentà con quel butelèto che I’èra deventà òmo sensa mai ‘bandonàr longo la strada i só sogni.
Guglielmo Marconi l’è mancà el 20 Luio 1937, setant’ani fa a Roma dove che nel 1914 l’era sta nominà Senatòr a vita e dove I’avèa ricevù el titolo de Marchese nel 1929 e la carica a Presidente del Consiglio Nassionale de le Ricerche e dell’ Acamedia d’ltalia.
Nel 1909 el “nostro” grande I’à pure ricevùdo el Nobel par la fisica.
Nato a Bologna nel 1874, I’avèa studià oltre che ne la só cità, a Firenze. Fin da giovanissimo l’aveva intuido la possibilità de doparàr le onde elettromagnetiche par mandàr segnai a grande distansa, dedicandose così a la telegrafia senza fili. Verso el 1895 dopo diversi esperimenti fati ne la só casa a Pontecchio, l’è riussì a farse capir fin a 2400 chilometri de distansa usando un’antena diressionale. ‘Stó sistema el I’à brevetà in Inghiltera nel 1896 fondando a Londra la “Marconi’s Wireless Telegraph and Signal Company”.
Nel 1899 I’à mandà segnai radio in Francia traverso la Manica e il 12 Dicembre 1901 usando un’antena de 130 metri solevà da un aquilón l’è riussì a trasmetar el primo segnai radio transoceanico tra Poldhu in Cornovaglia e St.John’s ne l’isola de Teranova.
EI só sistema l’è sta adotà da le navi italiane e inglesi e nel 1907 è partì el primo servissio pubblico transatlantico de telegrafo sensa fili.
Uno dei primi SOS l’è sta quel famoso lancià dal TITANIC nel 1912 che, come savemo, l’à permesso de salvar tante vite nonostante el disastro, e ani dopo nel 1928 un altro altretanto famoso S.O.S. l’è sta quel che à permesso el ritrovamento de Umberto Nobile e dei só omeni ne la “Tenda Rossa” al Polo Nord dopo la tragedia del “dirigibile Italia”.

Ne la prima guera mondiàl Marconi el g’à ‘vù l’incarico de organisàr el servissio italiàn de telegrafo sensa fili e in quel’ocasión l’à realisà la trasmissión a onde curte par efetuar le  comunicassióni segrete. In seguito l’à continuà con i so esperimenti fin a esplorar le onde curtissime e le microonde.

…e mi me domando che altro mai l’avarìa podù inventàr se 70 ani fa el Padreterno no’l l’avesse ciamà a trasmétar da’n cao a l’altro de l’universo… el concerto de le stele!

Wanda Girardi Castellani          

↓