L’Angolo de la Wanda – Novembre 2015 – “La Spluga de la Preta”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

La Spluga de la Preta

El Corno d’Aquilio.

 

Sora Verona, in ’na bela giornata de sol, se pòl védar i monti che ghe fa da corona. Verso el Garda domina el monte Baldo, a nord ghè l’altipian de i Lessini e a est, verso Asiago, el grupo del Carega. ’Na roba che in distansa no se indovina l’è che tra el Baldo e la Lessinia ghe passa la Val d’Àdese… Invesse se vede ben che i Lessini in quel punto i ga come n’inpenada: da i mile metri tipici i se alsa a più de mileçinqueçento, culminando in una ponta alta e solitaria. El so nome l’è “Corno d’Aquilio”, nome che probabilmente el vien dal latin “aquilus”, cioè “maron”. Ma no l’è par la so belessa o par èssar el monte che domina la Valpolesela che el “Corno” l’è famoso in tuto el mondo, l’è par quel che el ga “dentro”: uno de i più incredibili labirinti de caverne carsiche che se conossa!

Ben recintà da un giro de lastre de “piera de Prun” l’ingresso a la voragine.

“L’Abisso” (come el vien ciamà da i speleologi) el va zo dentro la montagna, sbusàndola par tuta la so altessa e rivando probabilmente fin al livel de la Val d’Àdese! Atenti però… no pensemo che dentro al “Corno” ghe sia un camin drito come quel de un vulcan: in realtà l’è un labirinto de cunìcoli, càmare, caverne… qualcosa de così complicà che anca dopo un sècolo de esplorassioni i speleologi no i è ancora riussidi de capirlo.
El punto de inissio el se trova in un prà, poco prima de rivar in çima al “Corno”. Lì, ben recintà da un giro de lastre de “piera de Prun”, ghè ’na dolina larga ’na diesina de metri. El so nome l’è Spluga de la Preta. Al contrario de Postumia però, conossù da secoli, de la “Preta” no se ga notissie fin a l’inissio del 1900. Ghè da dir che fin a la guera ’15-’18 lì ghe passava el confin (el Trentin alora l’era austriaco) e de gente in çima al “Corno” ghe ne passava gran poca.
Nel 1901 un prete de Ala, don Giovanni Cosser, nel scrìvar la prima descrission particolaregià de i monti Lessini el segnala anca la presenza de ’sta voragine in mèso al prà. Don Cosser el çerca anca de misurar la profondità, butàndoghe dentro de i sassi ligà con ’na soga, ma el riva solo a stabilir che la ga da èssar grande.

Na imàgine de la dissesa ne la “Preta”.

Nel 1909 el C.A.I. el fa ’na prima valutassion seria: 129 metri, ma bisogna spetar la fine de la prima guera mondiale (e che la zona la sia deventà finalmente italiana) parché nel 1925 senpre el C.A.I. el possa tentar ’na prima esplorassion in dissesa… calàndose dentro con le atressature adate. Con fadiga e pericolo se riva a tocar forsi i −500 metri. Nel 1954 riva anca i speleologi triestini (che de caverne carsiche i se ne intende!) e staolta se riva sicuramente a quota −594.
Par capir le dificoltà de l’esplorassion de la “Preta” bisogna farse n’idea de come l’è fata: ’pena soto l’apertura (la dolina) scominçia ’na cavità a forma de canpana: streta sora, larga soto… e fonda più de çento metri. Vol dir che la prima parte de dissesa te la devi far tacà via a ’na soga dindolante, e che fin che no t’è tocà el fondo no te pòl sponsarte su qualcosa de solido. Se pensemo che ’na casa de çinque piani l’è alta su i vinti metri, se pòl farse n’idea de cosa sia rampegarse su ’na soga longa siè volte tanto!
Una òlta rivà sul fondo de la “canpana” pararìa che no ghe fusse più gnente da védar… ma l’aqua che è piovù dentro nel corso de i secoli, la s’à scavà un “scarico”: ’na galerìa che la porta a n’altra càmara da dove parte altri cunìcoli che i porta a altre càmare in una serie infinita. L’è un labirinto vero e proprio e el se svilupa sia in senso verticale che orisontale. Par esplorarlo, a l’orba patoca e con solo la luce de l’elmeto, ghe vol un corajo da leon… anca parché pòl sucédar che un cunìcolo dove se ga strissià dentro a gato-mào par ore el possa finir de colpo, o che nel scuro se possa pèrdarse de vista.

Na foto de Antonio Danieli, che mostra un interno de l’abisso.

Dovemo anca pensar che ’na dissesa ne la “Preta” no te la fè mia in poche ore: ghe vol de i giorni! Vol dir che bisogna portarse drio da magnar e da dormir, roba pesante parché fa fredo, soghe, atressature e tuto quel che pòl servir parché, dopo giorni e giorni de dissesa, te si più distante dal mondo lì che a èssar su la luna.
Se ghè una che pòl apressar el corajo de i speleologi quela son mi, parché go da senpre la claustrofobia: me manca el fià anca solo a sentirme la querta su la testa… figurémose un chilometro de montagna!!!
Nel 1963 i speleologi i è rivà a la famosa “sala nera”, quota −900 metri, punto più profondo finora tocà. Ghè le prove che la dissesa la possa continuar ancora e la ricerca la va avanti: le ultime spedissioni i è stà nel 1992 nel tentativo de trovar l’ussita in Val d’Àdese e con l’ocasion è stà girà un film: titolo “L’Abisso”. L’esiste in DVD (mi ghe l’ò) ma l’è ormai dificile da trovar.
El 20 Lulio del 1964 ghè stà l’unica disgrassia in tuta la storia de l’esplorassion de la “Preta”: Marisa Bolla Castellani, incinta e mojèr del capospedission Luigi, l’è precipità dentro una de le caverne a quota −200. ’Na targa vissìn a l’ingresso la le ricorda, e la ne ricorda anca che l’esplorassion del mondo scuro e sconossù che gavemo soto i piè no l’è mia sensa pericoli… ma che se no ghe fusse ci afronta i pericoli no saréssimo mai rivà dove semo rivà!

Wanda Girardi Castellani
Mirco Castellani

↓