L’Angolo de la Wanda – Novembre 2012 – San Zen… “Vescovo moro”

…a cura di Graziano M. Cobelli

 

gcobelli05@gmail.com

Quatro Ciàcoe: da Verona

San Zen… “Vescovo moro”

Del nostro Patrono San Zen, dito el “Vescovo moro”, cantava Berto Barbarani “Che ’l pescava ne l’Adese le trute col pastoral d’argento incantador”… questo parché ne la celebre statua che se trova da secoli ne la so milenaria basilica, el vescovo sentà sul troneto co’ ’na man el benedisse i fedeli e con quel’altra el tien el pastoral con in pingolon ’na truta. Quel pesse, paraltro, no’ l’è l’unica particolarità de la bela imàgine venerada da tuti i veronesi… el santo el te varda con stanpà sul muso un soriseto sornion, soriseto che el ga fato meritar el titolo de “San Zen che ride” (co’ la inmancàbile coa conossù da tuti i veronesi: “… e paparele calde”). Guardando la facia simpatica de San Zen, se nota anca che el santo Patrono de Verona i l’à fato scuro de pèle, un african… uno de i primi extracomunitari vegnù a laorar qua.
Beh, el nostro San Zen (Zenone a l’anagrafe) l’è stà nominà Vescovo de Verona 1650 ani fà l’8 dicembre del 362 e st’ano, con la ricorensa del so insediamento, è inissià una serie de festegiamenti che da i primi de April 2012 i continuarà par tuto l’ano fin al 18 de Dicembre.
Zenone l’è nato intorno al 300 a Cesarea de Mauritania, l’è stà sicuramente consacrado Vescovo de Verona l’8 dicembre del 362 e l’è morto el 12 de april de ’n ano fra el 372 e el 380.
La storia de San Zen l’è quanto mai aventurosa e nel corso de i secoli la s’à arichì de legende e tradissioni. Tra i tanti miracoli racontà da San Gregorio Magno ghè quel de quando le aque de l’Adese in piena, dopo aver roto ogni àrgine e travolto tuto i è rivà fin a la cesa (piena de gente), ma invesse de sfondar tuto i è andà-sù in vertical fin de sora de i copi sensa entrar dentro. El santo Vescovo l’à busarà anca el diàolo Bandindon, faséndoghe portar a spale dentro in cesa ’na monumental vasca de piera (da usarse come bastistero) co’ la promessa de cédarghe in cambio l’anima. La vasca l’era un dono del re Gallieno, in cambio de la guarigion de so fiola, operà poco prima dal Santo. Quando el diàolo l’è stà dentro con la fontana su le spale, el santo con ’na benedission el l’à fato sparir, e la piera, cascando a tera, de bòto, la s’à crepà. La crepa se pol védarla anca ’desso.

Tornando al presente, i festegiamenti par la ricorensa i se snodarà longo tuto l’ano è i comprendarà un viaggio de le reliquie del santo, che partendo da la basilica de san Zen e passando par el duomo, le tocarà molte altre cese e parochie de Verona e provincia.
Con l’ocasion del “pelegrinaggio” de le reliquie è stà fata una ricognission su i resti del Santo, (l’ultima l’era stà fata 50 ani fà, nel 1962) con l’intension de ricostruirghe con le tecniche moderne la so precisa facia e con l’esame del DNA de capir realmente de dove el fusse originario (e, par la curiosità secolare de i veronesi, saver se l’era veramente “moro”… o no).
Nonostante i secoli, el scheletro del santo l’è risultà ancora intato. I lineamenti i sarà elaboradi da un computer de la Queen Mary University de Londra e quando i risultati i sarà resi noti, a distanza de tanti secoli finalmente se podarà védar come l’era realmente el nostro patrono.
Tornando a i festegiamenti, el longo pelegrinagio scominsià el 7 setembre e continuà con la procession del 13 setembre traverso la cità, da la catedral a la basilica, e el terminarà, dopo el longo itinerario, con la deposission definitiva de le relichie ne la cripta de la basilica de san Zen, l’8 dicenbre, con la messa solene presiedù dal vescovo attuale, Giuseppe Zenti.
L’urna che contien el corpo del Santo l’è un gioiel de oreficeria. Ani fa ghè stà robà al Santo l’anel vescovile e a rifàrghelo è stado Angelo Antoniazzi, el nostro indimenticabile orèvese (che l’à pure rifato la corona de la Madona, anca quela sgranfignà da i soliti ladri). Ricordemo anca el “gialo” de la sparission del tritico del Mantegna, tornà par fortuna sora l’altar magior.
In dicembre, tornado el santo al so riposo milenario, le università de Verona e de Bologna le podarà elaborar i dati racolti e ricavar risposte su le so abitudini de vita, su la so età e magari sul color de la pèle. Comunque scuro o no che ’l fusse, par tuti i veronesi San Zen el gavarà sempre la facia simpatica che se pol védar ne la so statua in basilica: larga, bruna e con un bel sorriso alegro.

Wanda Girardi Castellani