L’Angolo de la Wanda – Novembre 2006 – “San Fermo, San Rustico (con san Zen… tri extracomunitari patroni de Verona)”

…a cura di Graziano M. Cobelli
gcobelli05@gmail.com
Wanda Girardi Castellani


Quatro Ciàcoe: da Verona

San Fermo, San Rustico
(con san Zen… tri extracomunitari patroni de Verona)

Verona la g’à un primato; quel de averghe par patroni tri extracomunitari; infati, sia San Zen (ciamado el “Vescovo moro”) che San Fermo e ‘l só parente San Rustico, i era africani.
El martirio de Fermo, nobile bergamasco ma nato in Africa e de Rustico, l’è avegnudo in riva a l’Adese andove in seguito ghe stà’ fata in só onór ‘na ceseta dita “del Crocifisso”.
No’ se sa de preciso parché i du Santi i sia vegnù morir a Verona. Pàr inveçe che dopo el martirio i sia stadi riportà nel “continente nero”. I è po’ rientrà in Italia nel Vlll secolo, “ospiti”del castel de Capri (Capodistria). Da li i à fato “samartin” a Trieste par po’, riscatadi a peso d’oro, èssar riportadi a Verona andó che finalmente i à catà stabile dimora.
La storia de Fermo e Rustico che la cesa veronese la tien in grande considerassión tanto da ‘vérghe dedicà altre cese, tra le quali San Fermo minór, ai Filipini, l’è ilustrà da un componimento medioevale; el “Ritmo pipiniano” (sec.Vlll) che’l ne fà elogio anca par la richessa de le relichie che conservemo. La storia dei du martiri l’è pure ilustrà sul portàl de la cesa de San Fermo magior, ne la parte de sora, con un capolaoro abastansa recente (1984-1988). Se trata de formelle de bronso, messe a formàr le dó ante del portàl (sul modèl de quele de san Zen); amirevole opera del scultór Luciano Minguzzi.
Andando a çercàr le trace de le vece cesete che nel corso dei secoli le g’à dovudo lassàr el posto a altri fabricati, incontremo, almanco su la carta, in via Garibaldi, San Fermo in Cortalta. Sul terén de ’sta cesa; ‘na cioca con soto le ale ‘na fila de casete pitoche de proprietà de’n çerto Buri, nel 1878 è vegnù su el grandioso palasso Miniscalchi.
Secondo la tradissión San Fermo in Cortalta l’è stà’ fata nel lógo andove è stà giudicadi e incarceradi San Fermo e San Rustico. L’èra assè antica, infati la catemo za in documenti del Xll sec.
Più de ‘na olta restaurada, ‘na lapide su la fassada la faséa mensión de quela fata nel 1525 da un çerto Michele Musico. In ‘sta cesa par secoli è stà’ conservà la “sacra spina” overo la spina de’n grosso pesse marino co’ la qual gh’è stà’ taià la testa, sempre secondo la tradissión, ai dù Santi.
‘Sta relichia, de la qual i veronesi de ancó no’ i sà un figo seco, come de tante altre robe, l’è stada portà po’ ne la Catedràl e la se trova ne la capela de la “Madona del popolo”, serà in ‘na fodra de fero che l’è drento ’na custodia de legno intaià e dorado, fato far nel 1670 dal Vescovo Pisani.
Ma tornando a la ceseta in Cortalta; l’è stada butà-zo nel 1806 ma el demanio nel 1812, generosamente el g’à cedù al Comune la pala che guarniva l‘altar magiór, come contributo a la pinacoteca comunàl a quel tempo in costrussión. La pala la rapresenta i du martiri con el Vescovo de Verona Sant’Annone e S.Maria Consolatrice e l’è opera de Pasquale Ottino.
Nel 1829, po’, Giacomo Mariani, parón de l’edificio, l’à fato butàr-zo anca el canpanìl.
Ma tornemo a parlàr dei dù martiri. I conta che durante’na grave siccità che da mesi la ghe rendéa la vita dura ai veronesi, fasendo secàr le piante, morìr le bestie e metendo a ris/cio de morìr de sé anca i òmeni, el Vescovo Annone ‘na note el s’à insognà che parché finisse ‘sta piaga bisognava riportàr a casa le relichie dei Santi Fermo e Rustico. ‘Péna sveio l’à mandà a ciamàr só sorela Maria dàndoghe a ela l’importante incarico de conpràr (parché a quei tenpi quel de le relichie l’èra un vero e proprio marcà) i corpi dei Santi, a qualunque presso. Maria l’è andà in Istria dove che i se trovava e dopo èssarse descarselà par riscatarli, co’l só pressioso carico l’è tornà de corsa a Verona. Quando che l’è stà’ drio passàr el ponte de le Navi, a metà strada s’à verto el cel e è vegnù zó un bródo a sece roèrse ! L’èra el miracolo che’l Vescovo con tuti i veronesi el se spetava. Só sorela Maria, par èssarde stà el strumento, i l’à ciamà “Consolatrice” e a la fine del Vlll secolo i à fato in só onór la cesa de Santa Maria Consolatrice, rinovada po’ in epoca romana e nel 1320 el Vescovo Tebaldo el g’à traslà el corpo de la Santa serà in un’urna de marmo rosso. Anca ‘sta cesa, nominà nei documenti del Xll sec. uno dei quai l’è conservà ne l’Archivio de Stato, l’è stà’ demolida nel 1806..
Fin a tuto el XVlll secolo nei periodi de grande siccità (che i gh’èra anca alora sensa el “buso ne l’ozono) era usansa portàr in procession la “Sacra spina” e l’èra obligo che ‘sta processión la se fermasse a la cesa de S.Maria Consolatrice proseguendo po’ par San Fermo, dito “Magior” par no’ confondarlo con quel dei Filipini.
Santa Maria Consolatrice la fasea parochia; una de le più picole tra le 46 de la çità. Nel 1700 la g’avéa in carico circa 150 anime.
Nel Domo, ‘na splendida capela la sèra la navada destra; l’è dedicada a Sant’Agata. Soto ‘sta bela arca scaligera, opera de’n maestro campionese, in un’urna de  marmo rosso, trasportado li nel 1806, gh’è el corpo de Santa Maria Consolatrice.
Quando la Santa l’à passà dunque el ponte Navi, soto ‘na lensa che l’èra la più grande de le benedissioni, l’à pensà ben che quelo l’èra el posto giusto par farghe intorno ai du Santi ‘na degna casa.
La bela, inponente cesa de san Fermo la g’à ‘vudo però ‘na storia longa e dificile. Se trata de dó cese una sora de l’altra; la prima l’è a livèl de la strada (cesa inferior) e quel’altra l’è soraelevà (cesa superiore). De un terso edificio resta solo i fondamenti, soto el paimento de la prima.
Le relichie dei Santi Fermo e Rustico i è conservade ne la cripta de la cesa inferior, portade li nel 765 dal Vescovo San Annone che’l ghe n’à curà la straslazione de persona, adornandole del famoso “Velo de Classe”; se trata de’n straordinario drapo ricamado, cusì ciamà dal nome del celebre scanpolo conservado nell’abazia de Classe in Ravenna. L’è formà da dischi ricamadi con le imagini dei primi Vescovi de Verona in ordine de sucessión, con dopo quele dei nostri Santi.
Par descrìvar el splendido complesso de san Fermo ghe voria n’altra diesina de pagine ma forsi se no’ lo descrivo pol nàssar nei nostri letori la voia de vègner a Verona a mètarghe el naso de persona; ‘na gita manco costosa e soratuto manco pericolosa de quele ando de solito se va, masenando meiara de chilometri,… sensa rèndarse conto che no’ gh’è bisogno de andar a l’estero quando in Italia e principalmente nel nostro Veneto, gh’è tesori che tuto el mondo el ne invidia!
Ghe zonto solo che, verso la fine de la guera, a salvàr San Fermo da l’èssar ridoto come la Fenice de Venessia dai spessoni incendiari dei “liberatori”, l’è stà un coragioso prete camilliàn, capelàn de le carceri e apassionado astronomo, del qual ò parlà su Quatro Ciacoe nel numaro de genàr del 1992 “Padre Ermenegildo Balbinòt “, “Dalle celle alle stelle”.

Wanda Girardi Castellani

↓