L’Angolo de la Wanda – Marzo 2007 – “QUANDO A CURARSE SE ‘NDAVA A SPREA”

…a cura di Graziano M. Cobelli
gcobelli05@gmail.com
Wanda Girardi Castellani


Quatro Ciàcoe: da Verona

QUANDO A CURARSE SE ‘NDAVA A SPREA

                                                                                               “vuto salvarte da la costipassión?
                                                                                               tiente in scarsela ‘na castagna mata”
                                                                                               “vuto che cressa la faméia?
                                                                                               magna tortèi co’ l’intremisia!”
                                                                                               “vuto netarte el fegato?
                                                                                               “bei l’aqua de cotura dei pissacani!”
                                                                                               E par tuto el resto… no’ sta’ farte mai
                                                                                               mancàr el “sal del prete” (magnesio)

 

In casa mia l’unico vero cerusico che godea de fiducia l’èra el dott. Pasoli, specialista in naso e gola; quel, par intèndarse, che me g’avea in cura, dato che ò sbossegà la parte mia, da che són vegnù al mondo a la maurassión, pèso de la Traviata.
Par el resto, se andava a Sprea da don Luigi Zocca (1918-1951), celebre erborista e paroco de quel paese che, col Pomari da Roarè (dr. Leone Pomari – 1924-1988) che esercitava a Roverè, di Velo) el giustaossi” de Sant’Andrea Toni Trettene, un par de preti esorcisti a san Bortolo e a Campofontana, la “comare de Velo” (Pucheria Caprara, osterica ed erborista, nota in tutta la Lessinia) e qualche altro personagio de manco valor, l’operava nel teritorio dei cimbri veronesi.
La só esperiensa nel canpo de l’erboristeria l’èra veramente granda e le só ricete, fate su misura, le funsiona ancora. Ancó, però, gh’è ‘na çerta dificoltà a catàr le erbe giuste parché, mentre ai tenpi de don Luigi gh’èra più canpi che case, ‘dèsso l’è tuto el contrario; canpi ghe n’è restà pochi… pra ancora manco e quei pòri scanpoli de broleti tegnissi, rintanà ai bordi de le strade ‘sfaltade… scuri e sofegadi dai scapamenti de le meiara de auto e moto che va ‘vanti e indrio 24 ore su 24, no’ i è çerto adati par far decòti e infusioni curative.
Me ricordo che me mama, in sela a la só bicicleta, a Sprea la ghe andava de spesso, specialmente par mi che dai 15 ai 18 ani me son portà un mal de quei che oltre a èssar “caìni” (in quanto i fa cainàr) i g’à par zonta la malora de far rìdar el prossimo quando che’l vièn a savér che te ghe i è!
Insoma… faséa fadiga a star sentà e, varda caso, ghe dovèa star 8 ore al giorno dato che faséa la stenodatilografa. Beh… el prete de Sprea el m’avèa prescrito: “far bóiar dele tresse de aio e po’ sentarse sóra al vapór”. Me papà, senpre pién de inissiativa, el s’avéa fato dàr dal nostro pistór uno de quei bussoloti de banda, da conserva, rossi, che i g’avèa stanpà sóra un alpìn drio ranpegarse. A casa, dopo averlo ben lavà, el g’avèa batù col marteleto tuto el bordo parché no’ me taiasse e me mama la g’avéa boìdo dentro le tresse de l’aio. Po, brincandolo co’ le ciapete la me l’avéa portà in bagno e mi me gh’èro sentà sóra. L’èra tanto el mal che g’avevo za, par conto mio, da no’ inacòrsarme gnanca che el bordo del bussoloto l’èra broènto. Qualche ora dopo, sentendo oltre al solito mal un sbrusiór tuto in tondo, g’ò dimandà a me mama de darme n’ociada de drio…  “Maria Santissima… (l’à esclamà la me vecia): I santi i g’à l’aureola in testa e ti te ghe l’è sul c…!!” Infati, ero decorà de ‘na scotadura che la paréa fata col conparso.
Insoma, almanco par quela volta li la riceta de don Luigi no’ l’à fato efeto. Ma me mama, dura, la gh’è tornà e dai e dai a la fine gh’emo trovado e cao! Fin alora, però, dopo de aver scrito a machina stando in zenocio… son ‘ndà avanti ‘n altro poco co’ ‘na camara d’aria da “Vespa”, ponpada, (ultima solussión de me papà) messa a mò de cussìn su’l me sgabèl da laoro.
In quel periodo, se non altro, g’ò ’vù modo de costatàr che de quel antipatico e pura carognoso malàn ghe ne pativa, con mi, mesa umanità e partanto ..”mal comune…!”
Ma tornando al prete de Sprea; morto lu à continuà a far circolàr le ricete del celebre prete-erborista, almanco fin a la fine dei ani “70”, la neoda Ada Zocca che la staséa de casa a san Felice ex. Inoltre, à funsionado fin a qualche ano fa la spissiaria del “prete de Sprea”, in piassa dei Signori (o Dante), sul cantón de la scala che porta al vòlto Barbaro. ‘Desso l’è possibile averghe ancora le colaudatissime ricete… se non altro quele stanpade su el volume de la Taucias Gareida “La medicina dei cimbri veronesi” a cura de Carlo Nordera. Un bel libro coredà de fotografie e de elenco de le piante usade dal botanico in tònega.
Mi ve ne passo qualcheduna tra le più conossude e sperimentà:
Ve ricordo che “decotto” vol dir far bòiar le erbe par el tempo prescrito e po’, dopo lassà depositàr, béar l’aqua, mentre par “infusión” vol dir butarghe sóra a le erbe l’aqua de boio e spetàr che la passa.

Eco alora le ricete :

Par la tosse : far un decoto con 20 gr. de viola con sucaro o (meio) del mièl.
Par depurarse in primavera : decoto con foie de nosa gr.20 – salvia gr. 20 – menta gr.20 – malva gr.20
Par el raspeghin e la raucedine: far bóiar par 10 minuti in 3/4 de litro de vin bianco salvia gr. 20- menta gr.30, e po’ far gargarismi 3/4 volte al giorno.
Par far andar via i brùfoli : decotto (10 minuti de fogo) in un litro e meso de aqua con: radisa de bardana gr. 30 – fiori del millefoglie gr.20 – dente de leon gr.20 – foie de nose  gr.20 – ortighe gr. 20. Se de beve du biceri al giorno e par tre volte a la setimana se se alsa de note, se se bagna tuti de aqua e asedo e se torna in leto sensa sugarse.
Par le bòte – se fa bóiar nel vin del parsemolo e se fa dei inpachi su le bote se nò… pestàr el tasso bardasso (e ‘sà èlo ?) opur va ben anca inpachi de aqua e asedo (questi qua… garantidi parché me mama la me curava cusì de le tante bòte che portavo a casa).
Par far andàr-zo la febre : Frassino, corteccia gr.60 – far bóiar par 10 minuti in un litro de aqua e bèarghene do/tre scudelete al giorno
Par el nervoso : iperico radisa gr.15 – sùcaro gr.30, se i missia e se ghe ne tol 2/3 cuciarini al giorno prima de magnàr.

Par l‘ernia : ònsarla 3 volte al giorno col grasso de volpe femena. (sincerarsene alsandoghe la coa)
Par l’enemia : par 15/20 giorni se g’à da magnàr un pìssego de ua passa nera.
Par le scotadure : fiori de iperico messi par tenpo né l’oio de oliva.
Par el mal de pansa : un bicér de late con un cuciarìn de parsemolo opur de fenocio fato bóiar nel late.,
Par far andàr-zo la febre in pressia : spugnàr tuto el corpo con l’alcool denaturado.
Par no’ andàr in piassa (pèrdar i cavei) un’onsa de oio de riçìn – miola de ganba de vedèl, onse una – se fa un unguento a caldo e pò’ se se frissiona.
Ma la medissina de le medissine, l’èra e ancora l’è “El sal del prete”, ossia el magnesio; un mineral miracoloso… bon par tuti (o quasi) i mali : La riceta, ècola qua : desfàr 25 grami de magnesio (de quel cristalisà, 20 grami inveçe se se usa de quel secà) in un litro de aqua e béarghene una chìcara al giorno par dù giorni… po’ passàr a dó, po’ a tre fin che s’è guaridi. No’ inporta se prima o dopo i pasti. Se g’à da sèitàr par tuta la vita se se vol po’ che la sia longa e sensa ricascade.

De ricete el prete de Sprea el ghe n’à lassà tante altre; praticamente par tuto!
Mi però me fermo qua.

Se volì saverghene de più, …podì senpre contatàr la casa editrice Taucias Gareida a Giazza (Verona)

Wanda Girardi Castellani

↓