L’Angolo de la Wanda – Maggio 2016 – “Dài che ’ndemo al cine!”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

Dài che ’ndemo al cine!

 

Teatro Ristori di Verona con poltrone a seduta ribaltabile

Mi fao parte de quela generassion che andava al cine. Anca parché fin a i ani ’60 se te voléi védar un film no ghèra tante alternative: la television, quando l’à scominçià a èssarghe, la gavéa el schermo pìcolo, in bianco e nero e se vedéa mal. I rari film che la te passava i era veci… e alora, se te podéi, te andavi al cine!
A Verona, come in tute le altre çità, prima che ghe fusse l’esplosion de cassete, DVD e Pay-TV, de cine ghe n’èra tanti: praticamente uno ogni canton… più ’vari “cine dei preti” (quei parochiali) e qualche cine a l’aperto, bon par l’istà. Ghè da dir che andar al cine fin a ’na vintina de ani fà el costava pòco, parfin par le magre scarsele de l’epoca. De solito se decideva sul momento: te s’èri a spasso co’ la fameja o co’ i amici… te passavi davanti a un cartelon… “Toh… guarda cosa i fa! L’avìo visto? Nò? Dài che ’ndemo al cine!” e te te infilavi dentro. Oviamente se entrava quasi sempre a spetàcolo scominçià, a l’orba patoca, vardando se in mèso a le teste ghèra qualche buso. Trovado, se pestesava regolarmente ’na fila de piè, passàndoghe davanti a quei sentà zo e confidando sul fato che col scuro forsi no i te riconossesse.
Fin a metà de i ani ’70 po’ al cine i fumava tuti. Se te gavevi la sfortuna de èssar distante dal telon, el film te lo vedevi ’traverso la nebia come se la storia la fusse anbientà a Milan a i primi de febrar. Par oviar al problema, alcuni cine più “tecnologici” i gavéa el querto che tra un spetàcolo e l’altro el se verséa par canbiar l’aria (d’inverno però, par tegner el caldo te te tegnevi anca el fumo). Comunque se te riussivi a sentarte zo ben… senò te faséi “tapesserìa” longo i muri, seguendo co’ ’n ocio el film e con chel’altro i spetatori: se uno el se alsava partiva la gara a ciaparse el posto… senpre con regolare pestesamento de piè, urtoni e maledissioni varie. Anca parché i cine de ’na òlta i era streti: altro che le multisala co’ le poltrone atressà par métarghe la cocacola e el sacheto de popcorn… ’Na òlta l’èra za tanto se te riussivi a trovarghe el posto a le ganbe. Comunque finì el spetàcolo un pochi (sbossegando come Violeta Valery a l’ultimo ato) i se alsava e i andava via… altri i rivava e i tacava a çercar el posto; ti intanto te restavi a cucarte qualche “prossimamente” come penitensa da pagar par védar el tòco de film che te mancava. Rivà al punto giusto, altra serie de urtoni, pestoni e maledissioni e a la fine te s’èri fòra.
D’istà però ghèra i cine a l’aperto! Uno (mitico) l’era el “Scaligero” de Borgo Venessia. A l’aperto te stavi da dio: ghèra largo, ghèra fresco… ghèra parfin el chioscheto de i gelati senpre verto… unico problema che ogni tanto tacava a végnar zo el brodo. Se scominçiava la resentada, te spetavi con passiensa che la finisse, e se i sospendeva la projession voléa dir che t’avéi butà via i schèi. ’Na roba del genere la sucede regolarmente anca ’desso in ’Rena… solo che lì se piove te ghe smeni çinquanta euri e no sinqueçento franchi come al “Scaligero”. Comunque, tornando a i cine de ’na òlta, se podèa dividarli in:
1 – “Cine de i preti”: de solito i gavéa anca ’na bona qualità e un presso basso. Praticamente ogni parochia la gavéa el suo. Uno de i “mitici” l’era quel de Borgo Venessia ciamà in bon dialeto “spuaceti”. El parché i le ciamasse tuti “spuaceti” no se l’à mai savù. (Par la cronaca el funsiona ancora!) El lato negativo de i “cine de i preti” l’è che dificilmente i faséa film recenti, e po’ mai film vietati a i 18 ani!
2 – “Cine de quartier”: solamente a Porta Vescovo (dove stava mi) ghe n’èra un par: l’Ariston e el Capitol (più l’Aurora a l’aperto). La densità l’era così anca par el resto de la çità. Presso basso, film recenti… i era i cine dove te andavi normalmente. In bilieterìa i vendeva quasi senpre anca gelati, cocacole, bagigi, caramele e altra roba da becolar durante el spetàcolo. In dialeto se ghe ciamava “cine miòla” parché ghèra la bruta abitudine de sparar con du déi le mioline de ua (o de altri fruti dotadi de aposito “miolin”) contro la suca de quei sentà du-tre file più avanti. De solito po’ ’sti cine i gavéa anca la “galerìa”. El telon te lo vedéi col binòcolo, ma no te gavéi nissuno sentà davanti… In “platea”, se te gavéi la sfortuna de èssar dedrìo a un “sucon” te “tirài el col” par tuto el film.
3 – “Cine de Centro”: te ghe ’ndavi ne le rare ocasioni o quando el film che te interessava i le faséa solo lì. Çerti cine i gavéa ancora la vecia inpostassion: longhi e streti, col telon distante e picenin in fondo (par esenpio el Marconi in via Mazzini)… altri però i era più moderni. Me ricordo ancora la maraveja de i veronesi (e mi con lori) quando semo andà a védar (ronpendo la musina) el cinema “Rivoli”, sul Liston (o mèjo, “soto al Liston”) de piassa Bra. L’èra el primo che invesse de èssar “longo” l’èra “largo”. Telon panoramico. Sentari a scalar (in modo da no védar el ‘copin’ de quel davanti) e finalmente ‘comodi’. Suono stereo (che te senti i aroplani che te passa sora). Qualità insoma… ovio che te spendéi dó òlte rispeto a ’n cine miòla, ma ’na òlta tanto se podéa anca far. Ancò el Rivoli l’è deventà ’na multisala… nel spassio de la vecia sala adesso i ghe n’à ricavà quatro! Ma se el Rivoli l’è sopravissù, par i altri l’è stà ’na strage… D’altronde ci è ormai che va al cine quando el film te pol védartelo in casa? Però me despiase… el spetàcolo che te dava el “grande schermo” nissuna TV, par quanto grande, la podarà mai dàrtelo!

Wanda Girardi Castellani
Mirco Castellani

Me ricordo ancora la maraveja quando semo andà a védar (ronpendo la musina) el cinema “Rivoli”.

↓