L’Angolo de la Wanda – Luglio – Agosto 2017 – “Riparte la funicolare”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Riparte la funicolare

   Dó ani par farla… e setanta par rifarla! Cusì se pol sintetizar la longa storia de la funicolare de Verona. Però, ’desso che finalmente l’è stà verta, posso parlàrvene. Da senpre la colina de San Piero la dòmina la nostra çità e za i Romani i gavèa costruì sora l’ARX: un tempio fortificà tuto marmi e colonine. Dopo è vegnù i Ostrogoti (Teodorico), i Longobardi (Alboino), i Scaligeri, i Visconti e par ultimi i Austriaci.

E ogni òlta che canbiava el paron el castel el vegnéa sgrandà e modernizà, secondo el gusto de l’epoca, fin a rivar a l’ultima version (quela austriaca) dotà sul davanti de ’na grande terassa. Da la terassa se vede un panorama de Verona belo da cavar el fià: la çità l’è tuta lì soto: i canpanili, l’Adese, el Ponte Piera, le Toresele col Santuario de Lourdes, la pianura là in distansa… Tuto belo sì, ma ghè un problema: se te si de Verona te ghè la machina, ma se te si un turista te ghè da ’ndar sù a piè… e quando finalmente te si rivà ormai “el fià” te l’è za perso tuto par strada.
Cusì fin da i primi del ’900 s’à pensà a ’na funicolare che rivasse sù, anca parché a quel’epoca el castel austriaco l’ospitava l’Academia de Bele Arti “Cignaroli” e cusì oltre a i turisti ghera anca i studenti che ogni giorno i dovéa scarpinarse la salita. Nel ’39 su direto interessamento de Mussolini (che a Verona l’avéa fato el militar e sicuramente el sarà ’ndà sù a pié anca lu) riva i schèi e el “via libera” a i laori. El progeto el vien afidà a ’na dita torinese, la Agudio, specializà proprio in costrussioni de quel tipo. El dislivel de 55 metri el vien superà con ’na rampa de 180 metri a pendensa costante del 36%. Su i binari vien previsti dó vagonçini de color verde: finché uno el va sù quel’altro el va zo, par po’ invertirse la diression al giro dopo. I vagonçini i porta 10 persone più el manovrador e el moimento l’è garantì da un motor elètrico ospità ne la stassion de partensa. I laori de costrussion i vien inissià nel 1939 e za el 4 Novenbre del ’41 ghè l’inaugurassion. Comunque, a parte el prestigio, la funicolare de schei a la çità la ghe ne porta pochi… i studenti del “Cignaroli” piutosto che tirar fora le quatro palanche del bilieto i preferisse fàrsela ancora a piè e i turisti a l’epoca i è ancora pochi.
Nel 1944 la funicolare la vien serà parché ormai casca le bonbe e, finì la guera, ghè altro da pensar che rimétarla in funsion. Ne i ani ’50 se smantela i vagonçini e se recùpera el fero de le rotaje. Nel ’75 ne la stassion de partensa (ormai udà de tute le parti mecàniche) se trasferisse el “Teatro Laboratorio” e lì el resta fin a qualche ano fà. De rimétar in funsion la funicolare se scominçia a parlar ne i ani ’80, ma l’è solo nel 2000 che, con un finansiamento de la Regione Veneto, vien fato el progeto. L’idea l’è quela de conservar el più possibile le struture originali (che ormai le fa parte integrante de Verona) ma de métar un solo vagon a andar sù e zo par un’unica rotaja al centro del percorso. Tecnicamente ’na solussion cusì la se ciama “ascensore inclinato”. Nel 2010 la Cariverona la ghe investe siè milioni de euri e cusì se dà el via finalmente i laori. Òvio che con ’n intervento cusì i inprevisti i è tanti… I ani i passa e ’l cantier l’è senpre lì. Nel 2014 l’apertura ormai la par roba de giorni… i giornài i è convinti: “Prossima inagurazione della Funicolare di Verona”… Nò che el 26 Magio 2014 va a fogo la stassion de arivo. I dani no i è mia gravi ma l’incendio par che el sia doloso. Cusì parte le indagini e intanto se ferma tuto n’altra òlta. A inissio 2017, altra iniession de schei e i laori i riparte. I riparte sì… e i se ferma subito parché par che sia stà trovà ’na tonba: che la sia quela de Alboino? Se vede archeòlogi armà de penelin ma de operai gnanca l’onbra. Ormai la nostra funicolare la scominçia a farghe concorensa al Domo de Milan.

Ma el tenpo el struca: ghè le elessioni del novo sindaco e Tosi el vol èssar lu a tajar el nastro. Cusì, a sorpresa, vènare 9 Giugno ghè veramente l’inaugurassion… con apertura a tuto el pùblico dal giorno dopo. Ormai no se ghe sperava più. El bilieto l’è onesto: un euro a persona con agevolassioni par vèci, zóani, veronesi de Verona e grupi. El sistema l’è anca predisposto par i disabili, ma no’ credo che i riessa a portar sù anca quei massa scancanadi come mi. Comunque no ghe n’ò mia bisogno: la vista dal castel San Piero me la ricordo ben come se ghe fusse stà ieri e ve posso garantir che l’euro del bilieto la le val tuto.

Wanda Girardi Castellani
Mirco Castellani