L’Angolo de la Wanda – Febbraio 2007 bis –”ÇENT’ANI FA MORIVA GIOSUÈ CARDUCCI”

…a cura di Graziano M. Cobelli
gcobelli05@gmail.com
Wanda Girardi Castellani


Quatro Ciàcoe: da Verona

ÇENT’ANI FA MORIVA GIOSUE’ CARDUCCI

A drita (de ci lo varda) de l’ingresso de la cesa de San Zen, tra le formele de piera che adorna la fassada ghe n’è una che l’è stà celebre tra i buteleti del tempo che fu. Tempi quando, capitanà dal barbaraniàn Minico Bardassa, i fioi de la me çità, ancora distanti e ignari de radio, Tivu, computer e videogame, i zugava scalsi in piassa al tamburèl. A ’sta piera i ghe ciamava “quela che spussa da inferno” e par sentìrghene meio l’udór da zolfo i usava sfregarghe sóra dei sassi… sassi che, dai e dai, i à finì col lassàr ciare infossadure perfetamente visibili (vedi articolo su Q.C. del marso 1986).
De l’inferno l’è pò’, oltre che la spussa, la storia che la riguarda. La rapresenta infati el Re Teodorico de Verona e dei Goti (e no parlo de biceri) che sul só cavàl  scadenà (mala bestia è questa mia…) el ghe core drio al cervo dai corni de oro; un trèpo (inghippo) del diàolo par menarlo drito, zó… “de Lipari in la regia de vulcano ardua che fuma…” a merità castigo par aver, tra le altre porcade, fato morìr in presón a Pavia Severino Boezio statista e filosofo romano (…de Boezio el santo viso, del romano senadór…).
‘Sta poesia: “La legenda de Teodorico”, pur non essendo tra le meio… (infati la g’à el metro del Coriere di Picoli; l’otonario) del 1° Premio Nobel italiàn de la leteratura, Giosuè Carducci, la g’à vu el merito, par i studenti veronesi de la me generassión, de farghe imparàr in maniera “indelebile” un tocheto de storia-patria e ‘dèsso la g’à anca quelo de darme el spunto par comemoràr ‘stó nostro pur grande poeta in ocasión del çentenario da la morte, avegnuda  a Bologna el 16 febràr del 1907.
Giosuè Carducci l’èra nato a Val Di Castello, in Versilia el 27 luio del 1835. Só papà l’èra dotór de condota ma, afilià a la Carboneria, par le só idee liberali l’à dovudo spesso cambiàr de posto. Giosuè el g’aveva 4 ani quando la fameia l’à s’à trasferì a Bolgheri, in Maremma  dove che l’è stà fin al 1848. De quel paesagio che g’à fato senario a la só infansia gh’è restà ne l’anima el ricordo che l’à fato rivìvar pò’ in tante só poesie come ne la  splendida “a San Guido”.
L’ano dopo par ‘n altro forsà “samartin” (trasloco) el s’à catà a Firense dove che l’à seguità i studi fin a la laurea conseguida brilantemente a la Normale de Pisa nel 1855, a soli 20 ani con ‘na tesi su la poesia cavaleresca.
Intanto el s’avéa dissocià dal Romanticismo e dal manzonismo de l’epoca  dichiarandose “Scudiero dei classici”.
Dopo un ano de insegnamento a san Miniato durante el quàl l’à publicà i primi versi, l’à ocupà ‘na catedra al liceo de Pistoia par pò’ passàr a la fine del ‘stesso ano a quela de leteratura italiana e eloquensa, su nomina del Ministro Mamiani, a l’Università de Bologna andove che l’è stà’, stimatissimo maestro de intiere generassioni de studiosi, fin al 1904.
Tra el 1860 e el 1870, l’à partecipà a la vita politica conponendo poesie polemiche e patriotiche, i Ciambi ed Epodi. Par la só propaganda in favór de Giuseppe Mazzini dopo Mentana; atività che g’à procurado diverse grane, gh’è fiocà in testa, par prima, la sospensión da l’insegnamento.
Nel 1870, eco pure ‘na sfilsa de dispiaseri tra i quai la gravissima perdita de la mama e de só fiol Dante.
Sempre fedele ai so ideai de libertà e de democrassia, coi ani l’à finì col èssar considerà el  “poeta nassionale”. Deputato par do legisladure, l’è stà’ pò’ eleto Senadór a vita. Solo alora l’à bandonà la só personale batalia contro el papato e la monarchia schierandose con el governo conservadór de Francesci Crispi.
Nel 1906, un ano prima de la só morte, gh’è stà’ conferì a Stocolma el più alto dei riconossimenti; el premio Nobel par la leteratura; el primo in assoluto par l’Italia.
La poetica carduciana, antimanzonista, che la specia l’ostilità de l’autór al sentimentalismo romantico e al spiritualismo che caraterisava la poesia italiana de quei ani, la se rivolge a le forme classiche e al naturalismo pagàn e la presenta un convìvar de elementi difarenti  che i  otién l’efeto de ‘na resa lirica de paesagi interiori (vedi la memoria de l’infansia ne le poesie “Davanti a san Guido o San Martin, al racoglimento de la “ode barbara” Nevegada, al fantastegàr de “Sogno d’istà”). Le poesie de Carducci, tute diverse tra de lóre ma tute “inpegnade” come “L’inno a Satana” (1863), l’ode “A la Regina d’Italia” (1878) e la rima “A Victor Hugo” (1881) no’ le se esaurisse de çerto nel çércolo de la leteratura.
Al classico se indirissa inveçe la quasi dolorosa nostalgia par le età eroiche che inbonbega, par esempio, le poesie “romane” de le Odi barbare e quele che le ricrea con quatro sapienti penelade el mondo de ’n medioevo comunàl.
Grande inportansa g’à ‘vù e g’à le sunominade “Odi barbare” (1877-1893) ‘ndo che l’autór l’à çercà de riprodùr in versi italiani i metri de la lirica greco-latina (vedi “Versificassión).
Gh’è da zontàr, in finis, che el “magistero” carduciàn el g’à ‘vudo ‘na grande influensa nel canpo de la critica tanto da fàrghene un precursór de la critica stilistica.
Alievi de Carducci i è stà’ Giovanni Pascoli, Manara Valgimigli, Severino Ferrari e Renato Serra.

Wanda Girardi Castellani

↓