L’Angolo de la Wanda – Maggio 2007 – “INTEGRADORI; avanti a pìrole come i astronauti!”

…a cura di Graziano M. Cobelli
gcobelli05@gmail.com
Wanda Girardi Castellani


Quatro Ciàcoe: da Verona

“INTEGRADORI; avanti a pìrole come i astronauti!”

Mi penso che, più che altro, la sia ‘na moda. Fato stà che quando se se sènta a tàola, oltre al piato, le possade e el bicér, l’è obligatorio destèndarse davanti ‘na brìgola di scatole, botiliete, bussoloti e flaconÇini, pieni de  pìrole e capsule de tute le dimensioni e  colori: lievito de bira, àio, soia, carota, mirtillo, ginseng, papa reàl, crusca, germe de gran, calcio, vitamine de tute le categorie ecc.
‘Na òlta se usava rifilarghe ai buteleti el pestilensiàl oio de fegato de merlusso; beh, anca lu l’è tornà in auge soto forma de capsulete nere che le và zó nel gargato… pulito-pulito, impinàndote de saludari “olii polisaturi” senza farte gomitàr anca el figà. Potensa de la moderna siensa “omeopatica”!
A dìrvela tuta, anca mi me són fata intortàr dal me farmacista e da qualche ano paro-zó la me bela rassión de “miracolosi integradori”, compreso la celebre Melatonina che, se no’ l’à m’à gnancóra stirà le ràpole, tirà-su el petoràl, rinfoltì e scurì i cavèi, almanco la m’à iutà a dormìr mèio.
Beh, ‘dèsso vedémo di orisontarse un fiantìn in tuta sta marèa de pastròci che giornalmente ghe zóntemo a la sana pastassuta, ale vece, crocanti rosete, al gòto de vin e via discorèndo; tuta roba, ‘sta qua, che ai nostri noni ghe bastava e ‘vansava, par formarse ‘na schena da sigureti (lu) e du fianchi da rassa (ela), ma i era altri tenpi!
1° – EL LIEVITO DE BIRA: vitamine del grupo B, proteine e aminoacidi. El iuta el ricànbio energetico (insoma, par noialtri l’è ‘na specie de benzina).
2° – LA LECITINA DE SOIA: co’ la sòia dèsso i fa de tuto: bisteche, gelati, paste, biscotini, bibite, i ciapa i rati, i cóse i ovi, i tosa le pégore ecc… Oltre a farte calàr de peso in quanto te te iludi de magnàr ma in efèti no’ te magni, la fa un poco da spassina impedindo la formassión de grassi e colesterolo.
3° – I PROPOLI: l’è ‘na sostansa che le ave le usa come disinfetante e la vièn usà anca da noialtri col stesso scopo.
4° – LA PAPA REAL: Pòre ave! Ghe freghèmo anca l’alimento esclusivo de la só “regina”! El contièn tuti i elementi principài de la nutrissión e magnàndola se dovaria teoricamente deventàr ‘na specie de “Nembo Kid” (mi ghe n’ò magnà a chili ma son senpre la solita “piaga” piena de artriti, artrosi e dolori reumatissi).
5° – GINSENG: Me piase sta radisa che la ghe soméia a’na dona in “Desabiliè” tacà-via a ‘na tenda come la Francesca Bertini! La me fa vègnar in mente la mandràgola de scolastica memoria. Sta pianta la juta a mantègnar l’eficensa fisica e mentàl (mi la uso par podér far le parole incrociate, specie el “Bartesaghi”).
6° – AIO: El fa ben par la pressión e l’è anca un potente disinfetante. Bisognarìa tórlo al naturàl ma par via dei boni raporti sociài convièn consumarlo in capsule o pìrole (se nò el fià el spussa che’l stènega).
7° – CRUSCA: Siora de fibre, la fa da gratacasóla a le buèle; come a dìr che no’ la nutre  però la tièn destrigà la pansa.
8° – OIO DE CAROTA: El contièn el carotene che l’è un magasìn de vitamina A; bon par la tintarela, par  i oci e par la pèl (personalmente, magno quintài de carote ma no’ò gnancora butà-via i ociài).
9° – FEGATO DE MERLUSSO: Bon par i butini (cressita) e par i veci (calo).
10° – CARBON VEGETAL: Assorbente (inutile par le mace de inchiostro e le padèle de grasso) l’elìmina la sgonfità de pansa.
11° – MIRTILLO : usà fin da l’antichità par la vista, vene e i capilari (ocio ai vestiti; el macia come el pecato mortàl).
12° – GERME DE GRAN: Pièn fin a le rece de vitamina E, el rinforsa pele, ónge e cavèi e el pol iutàr anca le done a restàr inÇinte (stò tolèndolo anca mi ne l’intento de finir sui “Guinnes dei primati” ma con poche speranse)!
13° – SELENIO: El contrasta la formassión dei radicali liberi (e mi dirìa che de Pannella ghe n’émo ‘bastansa de uno).
14° – MAGNESIO: (gnente a che far co’ la magnesia “rinfrescante e purgativa” e col magnesio par far le foto a l’orba) el iuta però anca lu le buèle a destrigarse specie ne la tersa (e quarta) età e soraturo el juta la funsionalità del calcio (forsi se la squadra de Maldini le ghe n’avesse fato uso ai mondiài la se la sarìa cavà meio).
15°- FERRO: (anca in forma de ciodi, buloni, guide, ranèle, ecc…) utile a le done, specie se abinà a la vitamina C.
ZONTEMOGHE ‘dèsso anca i prodoti “diet”; buste de polvar de ciocolata, sbarète, bibite ecc… tute robe che le andarìa in sostitussion de’n pasto o de tuti dó. In sto canpo mi son ‘n’esperta al 100% parché i ò proàde tute restando po’ sempre tonda come la luna! In compenso ò passà periodi de… “corsa” e altri de “piera” (l’è stà in quei, là… serà-su, che son deventà un drago in enigmistica).
L’è pura vera che i alimenti ancó i g’à manco sostansa de ‘na òlta. I pomi, lustri ch’i par tiradi a pàtina, no’ i g’à più el bao ma gnanca gusto. Le verdure se g’à da lavarle col bruschìn, e la varechina, piene come che i è de veleni. Ocio a le bisteche parché, come tuto el resto, anca le vache i è “mate”.
Parfìn el vin el dà da pensàr (vedi “metanolo”)!
E alora… via co’le pìrole; tuti astronauti! L’è anca ‘na bela comodità parché se risparmia de còsarse sui fornèi, de lavàr piati e anca de spendàr schei de… carta igienica.

Wanda Girardi Castellani

↓