L’Angolo de la Wanda – Ottobre 2008 – “Emilio Salgari con Bufalo Bill”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

Emilio Salgari con Bufalo Bill

Emilio Salgari

El me primo incontro con William Frederick Cody, meio conossù con el soranome de Bufalo Bill (“Guglielmo, el buffalo”, secondo l’alora cronista de l’Arena, Cap. Emilio Salgari) l’è stà nei raconti de me nono, Emilio Girardi che, a l’epoca de l’esibissión nel nostro anfiteatro del circo del colonelo Cody, nel 1890, el g’avéa 9 anni. La só fameia no’ l’avéa podudo pagàr el bilieto d’ingresso che’l costava ben un franco, pur el s’èra portà fin ala morte el ricordo de ‘n incontro con i pitoreschi cow-boys e i “indiani pelle-rossa” che, tra el 3 e il 17 de april i avea scorassà, su e zo par el Liston de la Bra tra la curiosità, condì da un fià de malfidensa, dei vero­nesi.
Verso la fine del 1940, pò’, ò ritrovà quei legendari perso­nagi tra le pagine de “La sovrana del Campo D’Oro”; uno tra i più fassinosi tra i volumi del me concitadìn Salgari.
Bufalo-Bill (1846-1917), dunque, reduce dai sucessi de Londra, Parigi, Napoli, Roma, Bologna e Milàn, anuncià da ‘na carga de propaganda e precedù da la fama del só corajo e de le só aventure, l’èra sbarcà a le 8 de matina del 14 aprìl a la stassión de Porta Nova tra ‘na marea de gente lì da ore a ‘spetarlo (ma zà altro personàl e altro materiàl l’èra rivà da ‘na diesina de giorni). Drio ai primi i à pò’ scaricà diversi altri cari de materiàl e bestie e un çerto numaro de carosse con i “primi atori”: cow-boys, vaqueros messicani, peoni e indiani Sioux, Arrapahoes, Brulè, Piedi neri, Cheyennes, Piedi Bruciati, Apaches e in testa i capi: Camicia-rossa, Orso de le Ròce, Cuore Nero, Corno D’Aquila, Collo Basso, Piccolo Capo, Orso Duro e el neodo de Mano Gialla; un pelle-rossa copà da Cody in un famoso conbatimento corpo a corpo a la fine del qual el “vincitore” (Cody) el s’èra aproprià del scalpo del vinto. Dai manifesti e da le locandine publicitarie s’à podù savér che la Compagnia la se componeva de 100 indiani, 100 tiradori, caciatori, cavalerissi ecc. 200 bestie (bufali, muli ecc).
Dai cari bestiame è vegnù-zó anca un çente­nàr de cavai (i legendari mustangs… paraltro batudi sensa tanta fadiga dai nostri buteri maremani) oltre a la famosa diligensa “Deadwood”, teatro de un bról de spaentosi assalti ogniùn dei quài g’avéa assà el só segno, più o manco disa­stroso.
Verona l’èra da mesi tirà come ‘na sfiondra, ne l’atesa de ‘stó avenimento. Tuti, grassie ai giornài, i savéa de quel che Bufalo Bill l’avea fato con Custer e l’epico “Setimo Cavalegeri” da l’ecidio del qual l’èra riussì fortunosamente a “sfetàr” .
De quela sanguinosa, memorabile batalia è restà inpressa in una dele pagine più nere dela storia americana la morte de Custer par man del capo sioux Sitting Bull che inoltre, secondo l’usansa, dopo averlo copà el ghe n’aveva pure magnado el cor.
Tuti, tra le altre, i savéa dei 5000 bufali che da solo el “colonèl” l’avéa abatù par procurarghe la carne ai operai afamadi, impegnà ne la costrussión de la ferovia Kansas-Pacifico. Deputato a la legisladura del Nebraska, inbatibile pistolero, cassadór e ‘dèsso anca atór, l’à riunì 118 ani fa, sui scalini de la ‘Rena, in dó rapresentassioni (scominçiade a le 14,30) del só circo e malgrado el tempo senpre lì-lì a minaciàr sece roèrse, più de diesemila spetatori con l’incasso, par quei tenpi “favoloso”, de £.15.000.
A far el paragón co’ le cifre e soratuto co’ le presense atuali che durante la stagión lirica, le pol rivàr a 30.000 par sera, vièn da dir : “Roba da rìdar!” Ma pensève che alora in ‘Réna no’ gh’èra praticamente foresti. In conpenso, grassie a un treno speciale organisà da la “società del tram” a pressi popola­rissimi, i nostri i s’avéa mosso parfìn da Cologna Veneta, Cal­diero, Lonigo, San Bonifacio, Soave, Vago, Illasi, Tregnago ecc.
Al spetacolo avéa partecipà, oltre che come cronista del giornàl principale anca come protagonista, Emilio Salgari, andàndose a inbusàr ne la scassadissima diligensa inseguì dai indiani.
Splendido e insolito spetacolo: rodèi, conbatimenti, gare de tiro; co’ le pistole, co’ i fusili, co’ le frece. Corse sfrenade intorno a la pista, dimostrassioni di varie abilità, specie da parte de ‘na “pistolera”; “la regina del rifle”, Miss Anne Oakley, e de’n cow-boy, Johnnie Baker, “re del Winchester”.
Applauditissima anca la cacia ai bisonti ! El spetacolo l’è finì co’ ‘na fantasia a la quàl à partecipà tuto el circo in un entusiasmante carosèl. I bilieti d’ingresso i costava : £ 3, quei de prima, £ 2, quei de seconda, e £ 1, i popolari.
Durante la permanensa a Verona de la troupe de Bufalo Bill gh’è stà anca un episodio divertente: a S. Piero Incarnario i stava laorando drio a un palasso, soto la diressión de l’ing. Galli.
Verso le 16, scavando par le fondamenta, i operai i à catà una de le galerie romane che, partendo da la ‘Rena, le finisse a l’Adese. L’ingegnèr l’à subito fato coèrsar co’ la tera l’inbóco, seguitando pò’ i só laori. Dopo un quarto d’ora i à però sentì bàtar e subito dopo i à visto cascàr un muro. Da lì è spuntà-fora tri cow- boys con tanto de capelòn. Figureve la sor­presa! I tri americani, co’ ‘na lanternina, a gato-gnào, trovà ‘n ingresso a la galeria, in ‘Rena, i se gh’èra aventurà sensa gnanca savér se i sarìa podù vegnérghene fora. Par só fortuna i èra sbucadi a casa Da Lisca; savìo che colpo se, magari un par de sècoli dopo, fusse spuntà da le “vestigia romane” i misteriosi reperti de tre crape da morto ornà da’n capèl da cow-boy?
In quei giorni Bufalo Bill el g’à avudo modo de conòssar e assùmar nel só circo un curioso personagio ; el Fraca, un “omo forsudo” che, sempre vestì de ‘na maieta a righe tipo “Ape Maja” con pontà sora un garofolo fresco, personal giornaliér omagio de’n fiorista veronese, el se esibiva ne le piasse tirando dó móle de fero, sbregando massi de vece carte ecc. Ani dopo, tornà a Verona dopo ‘na longa tournèe in giro par el mondo, el Fraca l’à riportà ne le piasse el so vecio spetacolo vantando de èssarse esibido davanti al Zar de la Russia. Naturalmente noialtri buteleti che faséimo in coro “buuuuuu!!” e lu el se rabiava parché davanti al Zar el gh’èra stà sul serio in compagnia dei cow boj e i pellerossa del circo del grande Cody.
Ma tornando al “colonèl”; finì el contrato con la ‘Réna , smantelà l’acanpamento del “Canpon” e bandonà le stanse a la “Colomba d’oro” de via Oberdan, ricaricadi i vagoni l’è ripartido ‘sta volta da la stassion de porta Vescovo, par continuàr la só tournèe.

Beh, ‘sta cronacheta del 1890 firmà dal “papà de Sandokan”; el capitano Emilio Salgari su incarico del giornàl “L’Arena”, ghe la dedico soratuto ai picoli letori de “Q.C.” che, pur se nati nel domila sicuramete i conosse e i ama “Pa-he-has-ka” (cavéi longhi, ne la lengua Cheyennes), overo el Colonèl William Cody ;”Bufalo Bill”… tanto che anca st’ano a la sfilada de le mascare al vénardi gnocolar se ghe n’à visto ancora tanti (anca me neodo Alessandro) vestìdi de fustagno marón co’ le franse, in testa la bareta de pél de opossun con tanto de coa e su la spala el storico Winchester… naturalmente a stròpolo!

Wanda Girardi Castellani

***

Foto da Wikipedia

***

 

↓