L’Angolo de la Wanda – Settembre 2009 – “A GIANNI RECCHI… ricordo de ‘n amigo”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

A GIANNI RECCHI… ricordo de ‘n amigo.

Gianni Recchi

 

M’è capità spesso ne le me noti longhe sensa sono de rivivar el momento magico de quel’ultima recita de poesie fata fora cità, co’ la partecipassión anca de me marì nela veste de autista.
Noialtri poeti del Cenacolo (Recchi, Feriani Franchini, Sartori, Da Re, Beltrami e tra le done, mi e la Carla Zanini Ferrari) finì la recita e el risòto a la pilota inafià da qualche goto, prima de inviarse su la strada par Verona, semo fermadi a far ‘na s-cianta de can-can nella piassa del paese che n’avéa ospità. A tegnér banco l’era lu; Gianni Recchi, ex diretór de banca in pension, valido e ben noto poeta prevalentemente in dialetto veronese. Se ghe fusse stà il Nobel dela barzeleta son convinta che’l l’avarìa conquistado. No ghe n’èra miga tanti boni de far divertìr senza mai “andàr zo de taco”. Le só satire i era spassosissime e intelligenti. Ma Gianni Recchi l’èra prima de tuto un valido poeta con diverse corde a la so cetra: amor, natura, satira, Patria.
Quela sera un ventesèl legero l’avea scominçià a destacàr le prime foglie giale dai platani del vialeto dove avéimo parchegià le machine. L’istà l’èra oramai finida e l’odissea del me Severino la se inviava ala fine. Non ricordavo di averlo più visto rìdar… pur è bastà un tocheto del repertorio de Gianni a supiàr via, sia pur par ‘na bruscada de minuti, tuti i pensieri e le soferense. Severino el rideva… el rideva de gusto brassado a ‘n lanpión e par quel momento de serenità e de alegria, in tuti ‘sti ani, ogni sera g’ò mandà col pensiér al vecio amigo Gianni la me benedissión.
L’avea conossù al Tripoli, un ristorante de san Zen, durante ‘na recita dei soci del Cenacolo che a quei tenpi lì el g’aveva la sede. Po’ fin che spetàimo el solito risoto in programa, l’indimenticabile Toni Beltrami l’è vegnù a presentarme un bel’omo elegante che’l m’à dimandà de darghe n’ociada a ‘na só poesia. L’ò leta e la m’è piasùda!. Da quela sera g’ò avù modo de lésar spesso le poesie de Gianni Recchi e g’ò avudo anca la sodisfassión de èssar stà mi a darghe, a Pescantina, el primo dela longa serie de premi che l’à merità. S’érimo nel 1979, al III° concorso sul tema “N’a persona che no desmentegarò mai”. La poesia la se intitolava: “Bruno Locchi deto el Pacioca; l’ulltimo vetural de la Bra”. Con i ani po’ la nostra amicissia l’è cressuda e la s’à rinforsà come la stima reciproca.

Gianni Recchi recita le so poesie Negrar (VR) 9 Agosto 2019

Gianni l’èra un poeta non solo sula carta… el d’èra soratuto nell’anima, e mi g’ò avù modo de constatarlo in più ocasioni. Dopo ever perso el compagno de la me vita m’è capità de ritornar a quel ristorante de san Zen. Me fiol Flavio el g’avea avudo un serio incidente col motorin e g’avéimo el morale in tera! Guardavo senza un s-ciantìn de voia el piatto de tortelini che g’avea davanti e no’ riussivo a trategnér le lagrime. A un trato ò sentì dó mane forte solevarme da la carega e atraverso el vel che me inbonbegava i oci ò visto el sorriso allegro de Gianni: “Wandina, no’ te permeto de piànzar sul piato!”. Alora avemo fato samartìn al taolo de Recchi dove anca só moiér la s’à inpegnà a farne desmentegàr tute le malinconie.
Tanti e importanti i è stadi i premi che Gianni l’à guadagnado. Tante le publicassioni tra le quali “Vardando la stela”, “Sercando poesia”, “Catullo in dialetto veronese” – Trenta carmi tradotti da cinque poeti del cenacolo : Gianmpaolo Feriani, Enzo Franchini, Gianni Recchi, Bepi Sartori e Tolo Da Re. Presentassion de Lanfranco Vecchiato e Giuseppe Faccincani).
Da qualche anno, a Negrar, con la colaborassion de Enrico Zorzi e dei fedeli coleghi più sóra citadi, l’à fondato el circolo “el luni del poeta” dandoghe a la poesia veronese una nova dignità.
L’è stata un’amara sorpresa savér de ‘sta grave perdita dal giornàl l’Arena, martedì 18 agosto 2009. Dei tanti veci amiçi nessuno à sentido il desiderio de comunicarme la triste notissia a voce o perlomeno telefonicamente.
Ma no’ importa. L’è stado belo ritrovarse ultimamente (e sia pur par poco) con i ricordi intatti de ‘na longa amicissia e risentirlo citàr quela curta orassión de Marcello Marchesi che la ghe calsava come un guanto:  “Signor, fa che la morte quando la vegnarà la me trova “VIVO”!

Wanda Girardi Castellani

↓