L’Angolo de la Wanda – Ottobre 2012 – “Verona in tola”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

Verona in tola

Desso che s’è fato fresco, se pol ben parlar de cusina. E continuo a parlar de quela veronese, forte del sostegno che ghe dà il nostro Giorgio Gioco.
Continuo cussì co un poche de ricete… in versi, sperando che le piasa e le serva a chi à la passion de l’arte culinaria.

***

LA RENGA
(la carne de i vecioti de ’na òlta)

La sa da sal, la spussa da freschin…
na spussa che a ogni buso va incajarse
e cresse nel magnarla un raspeghin
da ocórarghe i ponpieri pa’ stuarse!

Me nono el me diséa che da butin
se usava de polenta incoconarse
pociando su sto pesse a pian-pianin
picado da ’na trave a dindolarse.

Ai tenpi quan’ le çene i era grame
sgàlmare, renghe e tòpe su i ninsói,
la festa: ’na fetina de salame.

Ancó che i schei te sòfega la fame
e taca a far superbia anca i fasói…
te costa più ’na renga de ’n polame!

***

Riso a la pilota… col tastasal

EL RISO A LA PILOTA… COL TASTASAL

Par ci no se ne intende de porcame
el tastasal l’è pasta da salame
che a dirla in ’merican tirado a lissia
col riso fifti… fifti se lo missia.

Na seola tajà fina e un fià de buro
scriòltolelo ben fin che ’l vien scuro.
Desfado el tastassal se inpèara el tuto.
Vin bianco e infondo el riso pescà suto.

Formajo da gratar… ’na gran fiocada
ma alta come a Bosco de genar.
De guardia ’na botilia stajonada

e ’l mondo, guere e ciodi, e ci te vansa
desfàndose va in fumo a remengar
negài in ’sto paradiso de la pansa!

***

LA PASTISSADA
(de “burcio” o caval)

L’è fata co ’l caval da Consolaro
tanto che par ridurla tenarina
par sié ore a pianeto i la cusina
come i cosesse insieme infin el caro.

Del bon recioto, e séola: tanta e fina;
un pocio come un corvo drento el gnaro
e ciodi de garòfolo: un bel sbaro!
Teja de tera e fogo a “pipadina”.

El coerciolo sbarlota e soto el fuma
un parfumo che canta da tenor
e ’l stómego simenta… ciama e ruma!

Tra le ricete questa qua l’è el fior.
Se sbalio e Giorgio Gioco el me sgaluma,
che ’l me scusa… Da lu la vago a tór.

Wanda Girardi Castellani

↓