L’Angolo de la Wanda – Ottobre 2017 – “Mario Riva”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

Ci se ricorda de Mario Riva?

Sfojando una de quele riviste de “gossip” dove al massimo te cati che el tal el ga fato i corni a la morosa, a sorpresa ò troà ’n articolo che parlava de quando Mario Riva el ga lassà le strasse qua a Verona in Arena, durante el festival del “Musichiere”.
L’era l’agosto del 1960… e ormai par ricordar ci el fusse Mario Riva bisogna ’verghe ’na çerta età. Mi ghe l’ò, e l’articolo el m’à proprio svejà ne la memoria quela storia lontana e desmentegà, tanto che ò sentì la voja de contàrvela.
Nel 1960 la television l’era ancora ’na novità… la RAI l’avèa scominçià a trasmétar nel 1954, però a l’inissio i era pochi quei che ghe interessava ’verghe el televisor. A dar ’na mossa ga pensà nel 1955 Mike Buongiorno col so “Lascia o raddoppia”: el primo “telequiz” de la storia italiana. Le fameje (come la mia) che a forsa de cambiali le s’avéa inbarcà a crompar la TV (dó stipendi) la sera le dava ospitalità a tuto el condominio, sistemàndoli tra cusina e coridojo come se i fusse al cinema con al seguito distribussion de torte e fiasco de vin. Intanto era partì anca “Carosello”, la “Domenica sportiva”, el telegiornal, ecc. Nel ’57, a solo tri ani da l’inissio de le trasmissioni, la TV ne le case de i italiani l’èra na roba ormai ’bastansa difusa. Ovio che no ghera bar che podéa permétarse de èssar sensa, e ci ancora stava fasendo “musina” intanto el podéa ’ndar védarse le partìe al prèsso de un bicer de vin. Proprio in quel’ano, visto el sucesson de “Lascia o raddoppia” èra partì ’n altro telequiz: el “Musichiere”.


El zugo l’era cusì: a i concorenti ghe vegnéa fato scoltar un tochetin de canson… el primo che le riconosséa el dovéa partir de corsa e andar a macar un boton. Dopo el dovéa dir el titolo… Se l’avéa indovinà el vinséa schèi, se l’avéa canà el ghe rimetéa tuto. A condur la trasmission era stà ciamà Mario Riva.
Adesso el nome no dise più gnente a nissuno, ma alora l’era conossù parfìn da i sassi. Presente in radio fin dal ’38, ator de cinema con na çinquantina de film a l’ativo, cantante de “tormentoni” come la sigla de “Domenica è sempre domenica” (mai desmentegà), Riva l’era ’n istrion nato, come tuti i napoletani… (anca se l’era nato a Roma el sangue partenopeo el l’avéa ciapà da so papà). El “Musichiere” el faséa 20 milioni de spetatori ne i ani ’60, e quando l’andava in onda i cinema i restava serà parché l’era inutile vèrsar: l’Italia l’era tuta incolà a la TV!
El 21 Agosto del 1960 a l’Arena de Verona ghera in programa ’n evento storico: el “Festival del Musichiere”… musica, spetàcoli, zughi… el tuto po’ in grande stile parché a Roma stava inissiando le Olimpiadi e par l’Italia del primo dopoguera èssar al centro del mondo l’era un motivo de orgolio. L’Arena quela sera l’era piena come un ovo (anca parché i bilieti no i èra mia cari come ’desso), fodrà de telecamere e de rifletori. A dirìgiar l’orchestra ghera Gorni Kramer (ve lo ricordèo?) e la regia l’era de Garinei. A le 9 de sera Mario Riva el dovéa far el so ”ingresso trionfale” da ’na spece de sìvolo sopraelevà, tegnendo in man la fiàcola olimpica! Tute le luci i era puntà su l’ussita del sìvolo… forse l’è stà par quelo: orbà da i rifletori no l’à visto che prima de l’ussita ghera un buso: un passo falso e ’l ghè finì drento. La gente in ’Rena no la s’à acorta de gnente… tuti i continuava a scandir el so nome, spetando che el vegnesse fora, ma soto ’l palco intanto stava sucedendo el finimondo. El condutor l’era cascà malamente da n’altessa de tri metri su ’na pila de materiài de sèna e el respirava a fadiga. S’à ciamà un dotor. El dotor l’à ciamà l’ambulansa. Fora intanto ghera 10.000 persone che scominçiava a pèrdar la passiensa e Garinei l’à spedì la catante Miranda Martino a inprovisarse “condutrice” e dar la bruta notissia che “causa un imprevisto, Mario Riva non potrà essere presente”. Boato de delusion. Ma el spetàcolo (anca grassie a Renato Rascel, Tata Giacobetti del Quartetto Cetra e Miranda Martino) l’à podù ’ndar ’vanti. La verità se l’à savù el giorno dopo: Riva l’era in ospedal, e l’era anca messo mal: còstole rote, vertebre rote… conplicassioni… cusì par tuta la setimana a tégnar banco ne i “TG”, oltre a le Olimpiadi de Roma, ghè stà anca le notissie che rivava a spìssego da l’ospedal de Borgo Trento a Verona.

La notissia de la morte sul giornale.

El primo setembre però i giornài i à titolà: Mario Riva è morto! El 1960 par i italiani l’è stà ’n ano da desmentegar: in genaio era morto Coppi e in febraio Buscaglione… e ’desso anca Riva! El funeral l’è stà organisà a Roma tri giorni dopo. In un’epoca dove spostarse no l’era mia facile drio el feretro ghera 250.000 persone. Un fiume de gente. (Anca parché Roma l’era za comunque piena par le Olimpiadi). Dopo, come sucede sempre, el spetàcolo l’à dovù continuar. È rivà el secondo canale, el terzo, el color, le TV private, el digitale… e i telequiz i à continuà a èssarghe, passando dal “Rischiatutto” fin a l’“Eredità”. Però el “Musichiere” nò. Quelo l’è morto con Mario Riva, qua a Verona, el primo setembre del 1960.

Wanda Girardi Castellani
Mirco Castellani

↓